USA-mut soqutiginnittorujussuit anorersuaraluartoq: Nerisassat, immiaaraq politikkilu
Inoqaaluppoq amerikamiullu nerisassaataannik sallaallertoqarluni.
Nuummi anorersuaraluartoq USA-mi kina præsidentinngussanersoq malinnaaffigissallugu imerniartarfinni neriniartarfiutigisuni pissangasoqarpoq.
Neriniartarfimmi Killuni amerikap erfalasui qilaami erfapput, amerikamiullu nerisassaataannit peqataasut nerillutik.
Unnumilu pissanngatigineqartoq utaqqisaasorlu tassa qinersinerup inernera, paasiniarlugu qarasaasiamit angallattakkamit piareersimasoqarluni, isiginnaarutikkullu malinnaasoqarluni. Unnummi aaqqissuisup Lars Damkjærip qinersineq soqutigisorujussuuaa ukioq mannalu USA-mukarpoq qineqqusaartut malinnaaffigiartorlugit. Tassani aamma Joe Biden nulialu naapippai.
Taamaammat unnuup aaqqissuunnissaanut pissutissaqarluarpoq.
- Amerikami politikki soqutigisorujussuuara, aamma soqutiginneqatikka unnussioqatingerusukkakkit. Soqutiginnittut tamaasa aggersarnikuuagut qinersinerullu inernera angumerissaneripput paasinarsiumaarpoq, Lars Damkjær KNR-imut oqarpoq.
Killuni unnussiornerat nalunaqutaq ataatsimut unippoq, qinersinerullu inernera ataatsimut suli paasinarsinngippat aaqqissuisup angerlarsimaffimminut malinnaajartussallutik aamma oqaatigaa. Taassuma Joe Bidenip qinigaanissaa ilimagaa.
Unnussiortulli taakkuinnaanngillat. Killut affarliani imerniartarfimmi Daddys-imi aamma malinnaasoqarpoq.
Taakkua Namminersorlutik Oqartussani sulisuupput. Aamma amerikamiut nerisassaataannik nerrillutik. Aaqqissuisup Katrine Kjærgaardip kina præsidentinngussanersoq pissanngatingeqaa, aamma nunarput eqqarsaatigalugu.
- USA pissaanilissuuvoq, nunanilu killerni pissaaneqarnerpaanut ilaalluni, taamaattumik kina præsidentiunersoq soorunami apeqqutaasorujussuuvoq. Nunanut allanut qanoq politikkeqarnerat nunatta USA-llu suleqatigiinnerannut apeqqutaasorujussuvoq. Taamaattumik ulluinnatsinnut pingaarutilerujussuulluni, Katrine Kjærgaard KNR-imut oqarpoq.