USA-mut aqqut nutaaq Sulisitsisunit tigulluarneqarpallaanngilaq
Sulisitsisunit tamanna tigulluarneqarpallaanngilaq, tassami aalisakkanik qalerualinnillu allanik USA-mut nioqquteqarneq akisusinnaammat.
Royal Arctic Line Islandimiullu umiarsuaatileqatigiiffiat Eimskip nunatta Islandillu akornanni immakkut aqqut pisariillisarlugu suleqatigiinnissamut aprilimi isumaqatigiissusiorput.
AAMMA ATUARUK Royal Arctic Line USA-mut aqqummik nutaamik ammaalerpoq
Taamaalilluni Island aqqutigalugu USA-mut assartuinissaq pisariinnerulissaaq.
- Islandimut sapaatit akunneri tamaasa apuuttartussaavugut, Reykjavikkilu tassa aqqutigalugu toqqaannartumik Amerikamut aqquteqalertussaavugut. Taassumalu suleqatigiinnerup Islandermiunik tassa taanna periarfissaq pilersippaa, Royal Arctic Linemi pisortaanerup tullersortaa Aviâja Lyberth Lennert oqarpoq.
Assartuisoqartassappat piareersarluartoqartariaqarpoq
Aalisakkat nunatsinni ullumikkut avammut tunisaanerpaapput. Aqqullu nutaaq atorlugu aalisakkanik siunissami assartuisoqartassappat piareersarluartoqartariaqartoq, GE-mi aalisarnermut, inuussutissanut avammullu nioqquteqarnermut ataatsimiititaliami siulittaasoq Søren Brandt oqarpoq:
- Ukiorpaaluit qaangiummata misissoratsigu paasivarput qularnaveeqqusiisarneq pingaarutilerujussuusoq. Tassami amerikamiunik raajamik tupittoqarpat taarsiivigineqarujussuarnissamut suliassanngortitsisinnaammata, Søren Brandt oqarpoq.
Taannalu naapertorlugu USA-mi suliani eqqartuussisutigoortuni qularnaveeqqusiisarnermut tunngasut akisoorujussuupput. Taamaammat USA-mut tunisinissaq aarlerinaateqarsinnaavoq.
Saniatigullu tunisiniarnermi niuerfiup misissornissaa pisariaqarpoq. Taamaammat Royal Arctic Linep USA-mut aqqummik nutaamik ammaaniarnera periarfissanik ammaassanersoq, Søren Brandtip qularaa:
- Uagutsinnut akornutaaginnassaaq akitsorsaallunilu. Tasamanngaanniit suut pisiarineqarsinnaanersut ilisimanngilara, immaqa poortuutissat, Søren Brandt oqarpoq.
Nunarput USA-mut 2018-imi taaasarialimmik nioqquteqarsimanngilaq. Tassanngaanniit 4 millionit koruunillu nalingannut nioqqutissanik pisisoqarsimasoq, Kalaallit Nunaanni Naatsorsueqqissaartarfiup kisitsisaataani takuneqarsinnaavoq.
