USA-mi sinniisoqarfeqalernissaq DF-mit akerlilerneqarpoq
Dansk Folkepartiip nunanut allanut tunngasunut oqaaseqartartua, Søren Espersen, isumaqarpoq "naalagaaffiunngitsup" Kalaallit Nunaattut ittup nunami allami pisortatigoortumik namminerisaminik sinniisoqarfeqalernissaa naalagaaffiup allanut attaveqarneranut malittarisassanik unioqqutitsinerussasoq.
Nunatta Danmarkimi sinniisoqarfiani pisortap tullersortaata Adam Wormip, aviisi Jyllands-Posten naapertorlugu, sinniisoqarfiup niueqatigiinnermik siuarsaaginnarani, aammali Kalaallit Nunaata nunanut allanut politikkikkut soqutigisaanik suliaqarnissaanik oqarsimanera matumani innersuussutigaa.
- Soorunami taamaattoqarsinnaanngilaq, Søren Espersen aviisimut Kristeligt Dagbladimut ullumi oqarpoq.
Kalaallit Nunaata Washingtonimi sinniisoqarfissaanut aallartitat naalagaaffiup allanut attaveqartitsineratigut qanoq inissisimassanersut danskit nunanut allanut tunngasunut ministeriannut Martin Lidegaardimut nassuiaateqarfigeqquaa.
- Amerikamiut matumunnga soqutiginninnerat paasilluarsinnaavara, Kalaallit Nunaammi namminiiliveriarpat tamakkerlugu tiguniarnissaanut piareersimapput, Søren Espersen oqarpoq.
Aleqa Hammondilli sinniisoqarfik nunami namminermi politikkikkut qinersisartuminut atorniaannarpaa. Politikkikkut alaatsinaattut Københavnimi Nuummilu ilisimatusarfinneersut taama naliliipput.
- Danmarkip Kalaallit Nunaatalu isumaqatigiissutaanni erseqqilluinnartumik allassimavoq nunanut allanut tunngasunut politikki ataatsimoorluni susassaqarfigineqartoq. Taamaammat Kalaallit Nunaata Washingtonimi sinniisoqarfia USA-mut tunngatillugu namminersuussilluni ingerlatsissagaluarpat tamanna isumaqatigiissutinik unioqqutitsinerussaaq. Sinniisoqarfimmi sumut allamut atorneqassagami?, Københavnip Ilisimatusarfiani lektori Lars Hovbakke Sørensen taama aperivoq.
Taannalu dr.phil. Thorkild Kjærgaardimit Ilisimatusarfimmeersumit isumaqatigineqarpoq.
- Danmarkimut takutitsiniarneruvoq innuttaasunullu pissaaneqarnermik takutitsiniarnerulluni, Thorkild Kjærgaard aviisimut Kristeligt Dagbladimut oqarpoq.
Danskit naalakkersuisuisa Kalaallit Nunaata Bruxellesimi sinniisoqarfeqareernera maannamut innersuussutigisimavaat. Lars Hovbakke Sørensenilli EU-mi sinniisoqarfeqarnerup nunamilu USA-tut ittumi sinniisoqarfeqarnerup assigiinngittupilussuuneri erseqqissaatigaa.
- EU naalagaaffiunngilaq. Taamaammat USA-mi sinniisoqarfimmik pilersitsinikkut Aleqa Hammondip Danmarkimit atannginnerusumik ingerlatserusunneranik takutitsineruvoq sakkortooq, tamannalu siorna qinersinermi neriorsuutigisaanut naapertuulluinnarpoq, Lars Hovbakke Sørensen nassuiaavoq.
Kalaallit Nunaata sinniisoqarfiata ammarneqaqqammersup danskit aallartitaqarfianit ukiorpassuarnik misilittagaqartumit Kalaallit Nunaata soqutigisaanik pitsaanerusumik isumaginnissinnaanissaa Thorkild Kjærgaardip takuminaatsippaa.
- Kalaallit Nunaata sinniisoqarfiata Barack Obamap John Kerryllu oqaloqatiginiarnissaannut pikkorinnerunissaa qularaara, Kristeligt Dagbladimut oqarpoq.
Danskit nunanut allanut tunngasunut ministeriat Martin Lidegaard, Søren Espersenip apeqqutaanut akissuteqarniarluni Kalaallit Nunaannut tunngasunut ataatsimiititaliami tamanut ammasumik isumaqasioqatigiittoqarnerani najuutissaaq.
