Trump politiit atugaannik aaqqissuusseqqinnissamik isumaliutiginnittoq

USA-p præsidentiata Donald Trumpip Amerikami politiit atugaannik allannguinissamut siunnersuutit arlaqartut isumaliutigai.

Præsidentip illorsuani Det Hvide Husimi oqaaseqartartoq, Kayleigh McEnany, taama oqarpoq. Trumpilli iliuusissat suut eqqarsaaatiginerai oqaaseqartartup paasissutissiissutiginngilaa.

Politiit aningaasalersornerinut missingersuutit ikilineqarnavianngitsut oqaatigineqarpoq. Aamma politiinik atorunnaarsitsinissaq aqqutissaanngitsoq oqaaseqartartup erseqqissaaatigaa, arlaqartummi tamanna siunnersuutigisimammassuk.

- Politiit aningaasalersorneqarnerisa unitsinniarneqarnerannik iliuuseqartoqarnera præsidentip annilaarnarivaa, Kayleigh McEnany oqarpoq.

AAMMA ATUARUK USA-mi miniteriusimasoq: Trumpip USA-p tunngaviusumik inatsisaa avaqqutaarpallaarpaa

USA-mi nunanilu allarpassuarni inuit tuusinitilikkuutaat Amerikami politiit akornanni ammip qalipaataanik assigiinngisitsisoqarnera pillugu akerliussutsimik takutitsipput. Taartumik amillip 46-nik ukiulip, George Floydip, tigusarineqarnerani toqunerata kingorna taama pisoqarpoq, politiip qaamasumik amillip seeqquminik George Floydip qungasiatigut minutsini arlaqartuni nanertoqqagamiuk.

George Floydip toqutaaneranut akerliusut tuusintilikkuutaat sakkortuumik saassunneqarnissaannik Donald Trumpip USA-mi guvernørinut kaammattuuteqarsimanera isornartorsiorneqartorujussuuuvoq. Akerliussutsimik takutsitsisunut sakkutuulersuisitsinissaminik Donald Trump piffissap ilaani sioorasaarisimagaluarpoq.