USA-mi ministerinngortoq Issittup imartaani uuliasiornissamut akuersaartoq
Præsidentilli issittup imartaani uuliasiortoqartitsiniarnera gassisiortitsiniaraluarneralu eqqartuussisumit apriilip aallartinnerani itigartitsissutigineqarput. Issittup imartaani uuliasiortoqarnissaa gassisiortoqarnissaalu præsident Obamamit 2015-imi 2016-imilu inerteqqutaalersinneqarpoq.
Nappartat 27 milliardit sumiiffinnit uuliamik immerneqarsinnaanissaat missiliorneqarpoq, tamatumalu saniatigut ima gasseqartigisinnaalluni USA nukissiuuteqarnermut allanit eqqussisarunnaarsinnaalluni. Tamannalu Trumpip kissaatigaa.
David Bernhardt USA-mi apriilip qiteqqunnerani nunamut namminermut ministerinngorpoq. Taanna eqqartuussissuserisuuvoq, uuliasiornermillu siusinnerusukkut sulilluni, sinerissallu avataani uuliasiorluni qillerinernut akuersaartuusoq naluneqarnani.
AAMMA ATUARUK Obamap issittumi uuliasiornissamut inerteqquteqarnera eqqartuussisup atuutsikkusukkaa
Trumpip naalakkersuisui Alaskami eqqartuussisup aalajangiinera suliareqqitassanngortippaat, sinerissallu avataani Alaskallu nunataani uuliasiortoqarsinnaalerlunilu gassisiortoqarsinnaalerniassammat, aalajangiinerup sukkasuumik atorunnaarsinneqarnissaa neriuutigalugu.
Alaskap guvenøriata, Mike Dunleavyp Trump februarimi naapeqatigillatsiarpaa, kingornalu arlaleriarlutik oqaloqatigiittareerput.
USA-p qitiusoqarfiata nukissiuuteqarnermi ikinnerusunik killilersuuteqarnissaa guvenørip kissaatigaa. Taamaattoqassappat Alaskap uuliasiornernit, gassisiornernit, aatsitassarsiornernit Alaskallu orpippassuinit orpinnik tunisinernit aningaasarsiornerulersinnaassaaq.
Anchorage Daily News naapertorlugu, guvenøri Trumpimut allagaqarsimavoq, aatsaat maannakkut saqqummiunneqartumik. Mike Dunleavyp allakkamini siunnersuutigaa, Alaska qitiusoqarfillu suleqatigiillutik nukissiornermi naalagaalissasut aningaasarsiornikkullu siuariartortitsissasut.