Brasiliamit angalasut USA-mut iseqqusaajunnaartut

Brasiliamit angalasut USA-mut iseqqusaajunnaarsinneqarput. Amerikamiusut innuttaassuseqanngitsut tamarmik Brasiliamit USA-mukaqqusaajunnaarsinneqarallarput.

Coronavirusip siaruatsaaliorneqarnissaa siunertaavoq, amerikamiusut innuttaassuseqanngitsut tamarmik sapaatit akunneri kingulliit marluk Brasiliamiissimasut USA-mut iseqqusaajunnaarsinneqarallarput.

Præsidentip Washingtonimi illorsua sapaammi taama nalunaaruteqarpoq.

Nunanit allaneersut nappaammik Covid-19-imik USA-mi tunillaassueqqilinnginnissaat anguniagaavoq.

AAMMA ATUARUK Brasiliami illoqarfiit annersaanni napparsimmaviit ajalusooriaannaasut

Amerika Kujalleq coronavirusimik nunarsuarmi tuniluuffiunerpaalersutut Naalagaaffiit Peqatigiit peqqissuunissaq pillugu suleqatigiiffianit WHO-mit tallimanngormat taaneqarpoq.

Brasilia nunarsuarmi nunani Covid-19-imik tuniluuffiunerpaattut maanna inissisimavoq, USA-mi tunillatsissimasut taamaallaat amerlanerullutik.

USA-mi ilisimatusarfiup Johns Hopkins Universityp nalunaarsugai naapertorlugit Brasiliami tunillanneqarsimasut katillugit 347.000-nit amerlanerupput, coronavirusimillu toqquteqarsimasut 22.000-nit maanna amerlanerullutik.

USA-mi inuit 1,6 millionit tunillanneqarsimasut kisitsisit pisortatigoortut takutippaat, inuillu 97.599-it nappaat toqqutigisimallugu.