Brasiliami illoqarfiit annersaanni napparsimmaviit ajalusooriaannaasut

Borgmester: Coronavirusip ajornartoortitsinera peqqutigalugu Brasiliami illoqarfissuarmi São Paulomi napparsimmavinni inissat 90 procentii maanna atorneqarput.
Borgmesterip BBC-mut oqarnera naapertorlugu, Brasiliami napparsimmavinni inissat maanna 90 procentii atorneqarput. Taamatullu ingerlasoqaannassappat napparsimmaviit sapaatit akunneri marluk ingerlanerinnaani inissaarussinnaapput. Assi © : Amanda Perobelli/Reuters/Ritzau Scanpix
Allattoq Ritzau
maajip 18-at 2020 08:07

Brasiliami illoqarfiit annersaanni, São Paulomi, napparsimmaviit ajalusooriaannaasut, illoqarfiup annersaata borgmesteriata aarlerisaarutigaa.

- Coronavirusimik eqqugaasut amerlangaarmata napparsimmaviit inissaalatsineq pissutigalugu sapaatit akunneri marluk qaangiuppata angummassinnaajunnaarsinnaasut, borgmester Bruno Covas oqarpoq.

Borgmesterip BBC-mut oqarnera naapertorlugu, Brasiliami napparsimmavinni inissat maanna 90 procentii atorneqarput. Taamatullu ingerlasoqaannassappat napparsimmaviit sapaatit akunneri marluk ingerlanerinnaani inissaarussinnaapput.

AAMMA ATUARUK Bolsonarop peqqissutsimut ministeri coronap ajornartorsiutitsinerani soraarsikkaa

São Paulo Brasiliami illoqarfinni coronavirusimik eqqugaanerpaat ilagaat. Illoqarfissuarmimi tassani inuit coronavirusimik toqquteqartut maanna 3000-nngajaapput.

Brasiliami nuna tamakkerlugu coronamik toqquteqarsimasutut nalunaarsorneqartut sapaatit akunnerata naanerani 16.118-iupput. Brasiliami coronaviruserlutik nalunaarsorneqarsimasut, Spaniami Italiamilu nalunaarsorneqarsimasut qaangerlugit nunarsuarmi coronaqarnerpaat sisamaattut arfininngornermi inissippoq.

Coronavirusip tuniluunnera suli annertungaatsiarsinnaanera Brasiliami peqqissutsimut ilisimatuunit mianersoqqutigineqarpoq.