USA-mi sekundit 40-t ingerlaneranni ataatsimik toqusoqartartoq
USA-mi coronavirusimik nappaateqarlutik toqusut akunnerit 24-t ingerlaneranni 2000-t sinnerpaat, qaammatit arfinillit ingerlaneranni aatsaat taama amerlatigalutik.
USA-mi inuit 2157-t akunnerit 24-t ingerlaneranni marlunngormat toqusimasut, USA-mi peqqinnissaqarfiup nalunaarsorsimavai. Tassa sekundit 40-t ingerlaneranni ataatsimik toqusoqartarluni.
Tunillatsissimasutut siumorneqartut ullup unnuallu ingerlanerani 170.000-upput. Tunillatsittullu amerliartornissaat immikkut ilisimasallit ilimagivaat, Thanksgivingimummi atatillugu nalliuttorsioriartorlutik angalasut amerlanerat pissutaalluni tunillatsittut amerlinissaat ilimagineqarmat.
AAMMA ATUARUK Nakorsat sulerulutsinneqartut napparsimmavinni artukkerneqarnertik oqaatigivaat
USA-mi coronavirusimik tunillatsissimasut napparsimmavinnilu uninngasut amerliartupiloorput. Inuit katillugit 87.000-t napparsimmavinni uninngapput, coronavirus USA-mi tuniluutilermalli aatsaat taama amerlatigalutik.
Innuttaasut mianersornissaat, sulilu qanermut assiaqutsertarnissaat, inunnut qanillinaveersaarnissaat, pingaartumik isersimatillutik, nappaatit tunillaassuuttut pillugit USA-mi aqutsisoqarfiup pisortaata Anthony Faucip amerikamiut kaammattorpai.