USA tamat oqartussaaqataanerat pillugu ataatsimeersuartitsilersaartoq
Nunat tamalaat peqataaffigisaannik tamat oqartussaaqataanerat pillugu marsimi ataatsimeersuartoqassasoq, USA-p præsidentiata illorsuanit marlunngornermi nalunaarutigineqarpoq.
Nunarsuarmi nunat tamat oqartussaaqataannerannik ingerlataqartut ilungersunartorujussuarmik pisoqarnerani tamakkua qanoq aaqqiivigineqarsinnaanerannik takutitsisussaasut, USA-p præsidentiata illorsuanit nalunaarput.
Naalagaaffiit tamat oqartussaaqataanerannik aqutsisut kisermaassillutillu aqutsisut unamminnerat, soorlu Kina aamma Rusland, USA-p præsidentiata Joe Bidenip taassumalu naalakkersuisuisa qulequttatut samminiarpaat.
AAMMA ATUARUK Joe Biden qinigaaffiup qiterpaarnerani qinersisoqarnerani: Tamat oqartussaaqataanerat unammillerneqarpoq
Qulequtaq taanna Bidenimut amerikamiunullu immikkut ittumik pingaaruteqarpoq, USA-mimi præsidentimut tulliani qinersinissami Joe Biden Donald Trumpilu tamat oqartussaaqataanerat pillugu oqqaterujussuartussaappput, taakkuami tamat oqartussaaqataanerat pillugu isumaat assigiinngimmata.
- Tutsuiginartumik isertuaatsumillu naalakkersueriaaseqarnermut tunngatillugu unammilligassaqarnermiileruttorpugut. Tassa silap pissusiata allanngoriartornerani ajorniarneq, inoqatinik tatiginninnginneq teknologeeqarnermilu sutigut tamatigut allannguinerujussuit pissutaallutik tamat oqartussaaqataanerannik ilungersuuteqartut nunarsuarmi tamarmi sutigut tamatigut pisariaqartinneqartut ersarilluinnarpoq, ataatsimeersuartitsilersaartut oqaaseqaatiminni allapput.
