Joe Biden qinigaaffiup qiterpaarnerani qinersisoqarnerani: Tamat oqartussaaqataanerat unammillerneqarpoq
Amerikami qinigaaffiup qiterpaarnerani ullumi marlunngornermi qinersisoqarpoq.
Amerikami naalagaaffinni 36-ni kongressemut ilaasortanngortussanik ullumi qinersissapput.
Kongressemut qinersinerup saniatigut naalagaaffinni guvernørinut aamma qinersissapput.
USA-mi kongressemi ilaasortat inatsisartunut ilaasortaapput, guvernørillu naalagaaffiit ataasiakkaat naalakkersuisuisa siulittaasorisarpaat.
AAMMA ATUARUK Trumpip Pelosi asissoraa
Qinersinermi tamat oqartussaaqataanerat unammillerneqartoq, USA-p præsidentia Joe Biden qinigaaffiup qiterpaarnerani qinersinissaq sioqqullugu oqarpoq.
- Pissutsit piviusut aallaavigalugit nalunngilarput tamat oqartusaaqataanerat unammillerneqartoq. Tamannalu maannakkut illersortariaqarparput, USA-p præsidentia oqarpoq.
USA-mi republikanerit ajugaassagaluarpata amerikami suliffeqarfinni tamat oqartussaaqataanerat sanngiillisinneqassasoq, Biden oqalugiarami oqarpoq.
Demokratit inatsisartuni Repræsentanternes Husimi amerlanerussuteqarput, senatimili amerlanerussuteqaqqalaarlutik.
AAMMA ATUARUK Ataatsimiititaliap Trump USA-mi inatsisartut ataatsimiittarfiannik siorna saassussisoqarnera pillugu aggersarniaraa
Demokratit Repræsentanternes Husimi Senatimilu amerlanerussuteqaraluarunik, politikkikkut suliniutitik piviusunngortissinnaagaluarpaat.
Republikanerilli Repræsentanternes Husimi Senatimilu amerlanerussuteqassangatinneqartut, qnsersisartut isumasiorneqarneranni erserpoq.
Republikanerit amerlanerussuteqalissagaluarpata, præsident Bidenip demokratillu politikkikkut anguniakkatik Joe Bidenip ukiuni tulliuttuni marlunni præsidentiuffigisassaata sinnerani piviusunngortissinnaassanngilaat.
