Ataatsimiititaliap Trump USA-mi inatsisartut ataatsimiittarfiannik siorna saassussisoqarnera pillugu aggersarniaraa

USA-mi innuttaasut sinnerlugit sinniisoqarfimmi, tassa Repræsentanternes Husimi ataatsimiititaliap, USA-mi inatsisartunut siorna januaarip ulluisa arfernanni saassussinermik misissuisup, USA-p præsidenterisimasaata Donald Trumpip aggersarneqarnissaa maanna aalajangerpaa.

Ataatsimiititaliami ilaasortat, taakkunannga republikanerit marluk, isumaqatigiillutik Trumpip killisiorneqarnissamut aggersarneqarnissaa aalajangerpaat.

Inuit tuusintilikkaat USA-mi inatsisartut Washingtonimi ataatsimiittarfiannik saassussimmata, Trump qanoq akuutiginersoq ataatsimiititaliap paaserusullugu aggersarlugu killisiorumavaa.

AAMMA ATUARUK Trumpip USA-mi inatsisartut ataatsimiittarfiannik saassussisoqarneranik tusarniaanerit naapertuilluannginnerunerarai

USA-mi præsidentimut qinersinermi Joe Bidenip ajugaanera, taamanikkut præsidentip tullersortaata Mike Pencep tassani akuersissutigisussaagaa inatsisartut ataatsimiittarfiat saassunneqarpoq.

- Iliuuserisani pillugit akissuteqarnissamut pisussaaffeqarpoq, ataatsimiititaliami ilaasortaq Bennie Thompson demokratineersoq aviisimut The New York Timesimut oqarpoq.

Donald Trumpilli ataatsimiititaliap misissuineranut atatillugu aggersarneqarnera nalinginnaanngitsuusoq, taassuma ilanngullugu oqaatigaa:

- Taamaattormiuna amerikamiunut ammasumik iliuuseqarluta taama alloriartugut, Bennie Thompson nutaarsiassaqartitsivimmut CNN-imut ilaatigut oqarpoq.