Trumpip USA-mi inatsisartut ataatsimiittarfiannik saassussisoqarneranik tusarniaanerit naapertuilluannginnerunerarai

Donald Trumpimut siunnersortiusimasut qinersinermi peqquserluttuliortoqarsimaneranik takussutissaqanngitsoq, præsidentiusimasumut oqaatigisimallugu oqarput.
Naak Trumpip siunnersorterisimasai oqaraluartut qinersinermi peqquserluttuliortoqarsimaneranik takussutissaqanngitsoq, præsidentimut 2020-mi qinersinermi peqquserluttuliortoqartoq Trumpip attassimavaa. Assi © : Saul Loeb/AFP/Ritzau Scanpix
Allattoq Ritzau
juunip 14-at 2022 08:40
Nutserisoq Mads Lynge

USA-mi inatsisartut ataatsimiittarfiannik siorna januaarip ulluisa arfernanni saassussisoqarneranut atatillugu tusarniaanerit naapertuilluarnermut asissuinerusut, USA-p præsidenterisimasaata Donald Trumpip oqaatigaa.

Nutaarsiassaqartitsivik AFP taama allappoq.

Trump tusarniaanerit pillugit quppernerni aqqaneq-marlunni allaaserinnippoq. Allaaserisaq eqqarsaatigilluagaanngitsutut nutaarsiassaqartitsivimmit AFP-mit nalilerneqarpoq ataatsimiititaliarlu USA-mi demokratinit siuttuuffigineqartoq USA-mi ajornartorsiutinik aaqqiiniarnissamik aallutaqarnerusariaqartoq, Trumpip oqaatigaa.

AAMMA ATUARUK USA-mi inatsisartut ataatsimiititaliaata Trumpip unnerluutigineqarnissaanut takussutissaqarluarsorigaa

- Amerikamiorpassuit 2021-mi januaarip arfernanni Washington C-liarput qinikkat qinersinermut atatillugu erseqqilluinnartumik peqquserluttuliornerannut akisussaatinniarlugit, Trump ilaatigut allappoq.

USA-mi inatsisartut ataatsimiittarfiannik saassussisoqarneranut atatillugu tusarniaanerit ulluisa aappaat ataasinngornermi pivoq. Trump qinersinermi peqquserluttuliortoqarsimaneranik oqarnermini piviusumik qimarratiginnittoq, USA-p inatsiseqarnermut ministererisimasaa William Barr tassani ilaatigut oqarpoq.

Naak Trumpip siunnersorterisimasai oqaraluartut qinersinermi peqquserluttuliortoqarsimaneranik takussutissaqanngitsoq, præsidentimut 2020-mi qinersinermi peqquserluttuliortoqartoq Trumpip attassimavaa.

Aamma atuaruk