Kujallermi Borgmesteri: USA ataqqinninngikkuni aatsitassarsiornavianngitsoq
'Politikikkut tatisimanninneq, mitalliinerit ataqqinninngitsumilluunniit iliornerit atorlugit Nunatta pisuussutai tuniniagassaanngillat. Naamerluinnaq.'
Allakkani ammasuni, Kommune Kujallermi borgmesterip Malene Vahl Rasmussenip USA-p præsidentianut Trumpimut atorfilittaanullu, nassiussaani taamak erseqqitsigisumik allaqqavoq.
Tamanna præsident Trumpip Kalaallit Nunaannut Danmarkimullu qaammatit kingulliit ilungersunartorsiortitsingaatsiareernerani pivoq.
Kommune Kujalleq Nunatsinni aatsitassanik qaqutigoortunik aatsitassanillu pinngitsoorneqarsinnaanngitsunik peqarfiunerpaavoq. Taamaattumik nunanit allaniit aningaasaliiniat, assersuutigalugu USA aatsitassanik piiaaniarnissaat pingaartumik maani pissaaq.
USA-mili pisortaasut ullumikkutut pissusilersortillutillu oqalutsillugit Amerikamiut atorfilittat tamanna puiguinnarsinnaavaat, Kommune Kujallermi borgmesteri allappoq.
- Nunatsinnik, inuiaqatigiittut ingerlatsivitsinnik, ilitsinnik kiisalu innuttatsinnik nikassaaneq tatiginninnermik sumilluunniit aserorterisarpoq. Tatiginninnerlu piunngippat sumilluunniit piiaasoqassanngilaq.
- Siorannguamilluunniit naamik, Malene Vahl Rasmussen nangilluni allappoq.
Inuit avatangiiserlu isumannaatsuutinniarlugit inatsit sukannersoq
Kalaallit Nunaata nunatsinni pisuussutit uumaatsut, namminersorneruneq atulersinneqarmat 2009-mi oqartussaaffigilerpai.
Inatsisartut aatsitassarsiornermut inatsit avatangiisinullu inatsit, pisuussutinik uumaatsunik piiaanermi inunnik, uumasunik avatangiisimillu sapinngisamik illersuilluinnartussamik qulakkeereqataasussaq akueraat.
Kinaluunniit piiaanialissagaluarpat inatsisit malinneqassapput, Malene Vahl Rasmussen allakkamini erseqqissaavoq.
- Inatsisit taakku tamakkiisumik malinneqartussaapput - apeqqutaatinneqanngilaq kina piiaanissamik kissaateqarnersoq, kiisalu nuna piiaaniartoq qanoq angitiginersoq pissaaneqartiginersorluunniit. Isumaqatigiinniutissaanngillat.
USA-p Amerikamiut nunallu tamalaat isumannaatsuunissaannut Kalaallit Nunaata piginissaa pisariaqartikkaa, Trumpip atorfilittaasa arlaleriarlutik oqaatigereerpaat, Kinap Ruslandillu Kalaallit Nunaannik tiguaanissamik kissaateqarnerat innersuussutigalugu.
Taanna ilutigalugu Amerikami atorfilittat nunatta iluaniittunik pisuussutinik uumaatsunik piiaasinnaanissartik soqutigisarivaat.
Pissutsilli massakkutut itsillugit nunatta ilua matoqqavoq, Kujallermi borgmesteri erseqqissaavoq.
- Inuiaat kalaallit nunartik pisuussutaalu oqartussaaffigaat. Illillu naalakkersuisoqarfinni amigaateqarsimagussi, ataqqinninneq amigaatigaarsi.
Præsident Trump Natollu qullersaa Mark Rutte, Kalaallit Nunaanni sakkutooqarnerulernera pillugu pingasunngornermi isumaqatigiissuteqarput. Isumaqatigiissulli qanorpiaq imaqarnera suli tamanut saqqummiunneqanngilaq.
