Assi: Camilla Dam/KNR

Uranisiornissamut qinnuteqaatissamut itigartitsinissaq naalakkersuisup neriorsuutigerusunngikkaa

GME-p uranisiornissamut qinnuteqaateqarpat politikkikkut tunngavilimmik itigartitsinissamut pisinnaatitaaffeqarluni aatsitassanut naalakkersuisoq, Múte B. Egede isumaqarpoq. Taamaaliortoqassappalli Nunatta naalagaaffiit inatsisit tunngavigalugit naalakkersukkat tunngavigisaat malissanngikkai, inatsisinut professori isumaqarpoq.

Naalakkersuisut GME-p Kuannersuarni uranisiornissamik qinnuteqaatissaanut sulinerat aatsitassanut inatsimmit aallaaveqanngippat politikkikkullu akerliuneq pissutigalugu qinnuteqaammut itigartitsisoqarpat inatsisinut naapertuuttumik aqutsinerussanngitsoq, pissaanermillu allannguilluni atuinerussasoq, Københavns Universitetimi inatsisinut tunngasunut professorip Peter Paghip KNR-imut ataasinngormat oqaatigaa.

Inuit Ataqatigiit naalakkersuisoqataalermata tamanna oqallisaavoq. Nunatta uranisiorfiunnginnissaa partiip anguniagaasa pingaarnerpaat ilaanniippoq, GME-lu politikkikkut itigartinneqarsinnaanissamut piareersimasariaqartoq, Inuit Ataqatigiit siulittaasuata Sara Olsvigip oqaatigaa.

Aamma atuaruk Inatsisileritooq Uran pillugu inatsit Naalakkersuisut malittussaavaat

Qinnuteqartoqarnissaa naalakkersuisup utaqqeqqaarusukkaa

Aatsitassanut naalakkersuisoq, Inuit Ataqatigiinneersoq Múte Borup Egede, suliamut tunuarsimaneruvoq, siulittaasunilu isumaqatiginerlugu oqaatigerusunngilaa, GME-lu uranisiornissamut qinnuteqaateqarpat akuersissutigissanerlugu itigartitsissutigissanerluguluunniit naalakkersuisup maanna oqaatigereerusunngilaa.

- Qinnuteqaammik takkuttoqarnissaa utaqqimaaqqaarallarusuppara. Akuersissanerlunga akuersissannginnerlunaluunniit massakkut akinagu, Múte Borup Egede taama oqarpoq, ilanngullugulu oqarluni, qinnuteqartoqarpat Naalakkersuisut nalilersuissasut.

Allamillu oqarusunngikkaluarluni aatsitassanut naalakkersuisup siuliata, Randi Vestergaard Evaldsenip paragraf 37 naapertorlugu apeqquteqaammut akissutaanut innersuussivoq.

Naalakkersuisuusimasullu akissutaa isummernissaminut tunngavisatuaralugu Múte Borup Egedep oqaatigaa.

Aamma atuaruk Kielsen: Naatsorsuutigaara naalakkersuisoqatimma inatsisit malissagaat

"Sumilluunniit tunngaveqanngitsumik itigartissinnaavaat"

Randi Vestergaard Evaldsenilu akissummi allappoq, GME-p misissuinissamik akuersissuteqarneranut tunngatillugu atugassarititaasunut 2012-imit tapiliussaq suli atuuttoq, taannalu tunngavigalugu Naalakkersuisut ima inerniliipput:

- Naalakkersuisut qinnuteqaat namminneerlutik aammalu arlaannik tunngaveqanngitsumik imaluunniit sumilluunniit tunngaveqanngitsumik itigartissinnaavaat. Qinnuteqaat ilaatigut politikkikkut imaluunniit ingerlatsivimmi pinngoqqaatinik qinngornermik ulorianartunik akulinnik piiaanissamut akuersissummik tunniussisannginnissamik aalajangiineq tunngavigalugu itigartinneqarsinnaavoq.

Taamatulli inerniliisoqarnera Peter Paghip isumaqatiginngilaa. Oqartussaasut inatsisit avataatigut imminnut pisinnaatitaaffilersinnaanngitsut, Paghip oqaatigaa.

- Kalaallit Nunaanni oqartussaasut naalagaaffiit inatsisit tunngavigalugit naalakkersukkat tunngavigisaannut aatsaat malinninngippata taamaattoqarsinnaavoq, Peter Pagh KNR-imut e-mailikkut allappoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat