Uranimut akerliusut suli isornartorsiuipput
Uranitalinnik piiaaqqusinnginnerup atorunnaarsinneqarneranut aaliangiiniarnermi periutsit isornarluinnartuusut allaallu pissaanermik atornerluinertut isigeqqajaanarsinnaasut, Naamik Qujaannarpungamit isumaqarpugut. Suliniaqatigiiffik sinnerlugu taama tusagassiutinut allappoq, Marianne Jensen.
Taanna nangilluni allappoq, isumaqarlutik nunatta uranimik tuniniaasartunngornissaanik apeqqut, inuiaqatigiiusugut silarsuarmioqatigiit akornanni qanoq kiinnertariaaseqarnissatsinnut pingaaruteqarluinnartuusoq akisussaaffiliisorlu, taamaattumillu sapinngisamik inuiattut ataatsimoorfiusumik aalajangiiffigineqartariaqaraluartoq isumaqarlutik.
Inuiaqatigiit apeqqummut aalajangeeqataasimanngitsut, Naamik Qujaannarpungamit oqaatigineqarpoq.- Naak Danmarkimi nunat tamalaat akornanni pissutsinik ilisimatuumit nalilerneqaraluartoq, aatsaat ukiut tallimat qulillu ingerlanerini, inatsisit maleruagassallu iluarsiniarneqarsinnaassasut, aatsitassanut Naalakkersuisumit maanna nalilerneqarpoq, ukiut marlussuit taamaallaat ingerlanerinnaani tamanna pisisnnaassasoq. Tassunga suliffissuaqarfiup uranisiorumalluni qinnuteqassamaartup, Greenland Menirals and Energy-p pisortaa, ilaliilluni oqartoq aviisimi Politikenimi imatut issuarneqarpoq. Issuaaneq:
”Inuit nalinginnaasumik ilisimasaannit piareersimanerujussuuvugut. 2016-p aallartilaarnerani qaarusuliaq piareersimasinnaavoq, aallarnisarnermilu ajornartorsiutaasartut eqqarsaatigigaluaraanniluunnit 2017-ip qiteqqunnerani naammassisaqareersinnaavugut”. Issuaaneq naavoq.
GME-mit taama oqartoqarsimanera Naamik Qujaannarpungamit nassuiaqquneqarpoq.
- Suunuku Naalakkersuisut GME-llu pisortaata nalunngeqatigiiffigigaat inuiannut tusarliunneqarnikuunngitsut?Marianne Jensen tusagassiutinut nalunaarummini aperivoq.
Naamik Qujaannarpungali kisimi taama isumaqanngilaq.
Inuit Ataqatigiit Inuusuttaat tusagassiutinut nalunaaruminni aamma allapput, urani pillugu aalajangernermi tusarniarneqarsimanngitsut tusarniarneqarnissaat suliniutigiuarniarlugu oqarlutik uranitalinnik piiaaqqusinnginnerup atorunnaarsinneqarneranut aalajangerneq isornartortuusoq sakkortooq oqarlutik aalajangernermi inuiaqatigiit Naalakkersuisoqatigiinnit tusarniarneqarsimasariaqaraluartut avissaartuutsitsinermik pilersitsinatik.
