Uranimik attueqqusinnginneq oqaluttuaannanngorpoq
Uranimik Nunatsinni attueqqusinnginneq oqaluttuaannanngorpoq. Uranimimmi attueqqusinnginnerup atorunnaarsinneqarnissaanut aalajangiiffigisassatut siunnersuut partiit Naalakkersuisuutitaqartut amerlanerussuteqaqqalaarlutik ippassaq unnukkut akueraat.
Naaggaarluinnarnerup atorunnaarsinneqarnissaa pillugu oqallinneq nuna tamakkerlugu sakkortusimaqaaq, Inatsisartunili ippassaq unnukkut taasisoqarmat 15-it akuersipput, 14-illu akerliullutik. Akerliusut tassaapput Inuit Ataqatigiit, Demokraatit aamma Randi Broberg, Partii Inuit. Taanna imminut maanna ima oqarfigisinnaanngorpoq:
- Soorunami nuannaarutigeqaara aamma oqiliallaqaanga. Qamani aalajangiusimanera attallugu taasigama, aamma nuannaarutiginerpaavara partiima tunuliaqutsermanga, Partii Inuit sinnerlugit Inatsisartunut ilaasortaq Randi Broberg, siunnersuummut akerliulluni taasisoq oqarpoq.
Inuit Ataqatigiit taasisoqareersorlu ataatsimiittarfik qimappaat, taasinerup inernera soorunami apeqquserlugu. Taamaakkaluartorli Siumukkut allattoqarfiani nuannattoqarpoq. Atassutillu siulittaasua Gerhardt Petersen Siumukkut allattoqarfiata silataani naapipparput:
- Nuannaajallaqaanga, tassami amerlanerussuteqaqqalaarluta Inatsisartuni taamannak naammassivarput, aammalu ingerlaqqeriartussanngorpugut. Tassa aatsitassanik suliaqarnermi uranitaqalaarpata, imaluunniit annikinnerusumik annertunerusumilluunniit uranitaqarpata ingerlaqqissinnaanngorpugut, taavalu aamma sulilluta aallartissinnaanngorpugut malittarisassat taamannak akullit suliarinissaannut, Atassutip siulittaasua Gerhardt Petersen oqarpoq.
Ippassaq ulloq Aatsitassaqarnerrmut Naalakkersuisumut Jens Erik Kirkegaardimut ulapiffiusimaqaaq. Suliniutinut angisuunut tunngatillugu isumaqatigiissusiaq siulleq saqqummiuppaa, Inatsisartunilu ilaasortat ilaannit tatigineqannginnginnermik takutitsivigineqarluni, taasisoqarmalli aniguilluni. Uranimillu attueqqusinnginnerup atorunnaarsinneqarnissaa pillugu aalajangiiffigisassatut siunnersuutip amerlanerussuteqaqqalaaginnarnikkut akuersissutigineqarnera qanoq isumaqarfigineraa aperigatsigu taanna ima akivoq:
- Tassa una suliaq Inatsisartuni aalajangiiffigineqarpoq, Inatsisartullu suleriaasiat naapertorlugu amerlanerussuteqartut aalajangigaat atuuttarput, taamaammat amerlanerussuteqartut taasisimanerat naapertorlugu Naalakkersuisut sulissapput, Aatsitassaqarnermut Naalakkersuisoq Jens Erik Kirkegaard oqarpoq.
Siumukkut allattoqarfianni nuannappaluttut erinarsoqattaarlutillu pipput, siulittaasorisimasaalli Hans Enoksen taakkununnga ilaanani. Taanna uranimik attueqqusinnginnerup atorunnaarsinneqarnissaanut aalajangiiffigisassatut siunnersuummut akerliulluni taasivoq.
