Urani pillugu oqaluuserisassaq Siumup tunuartippaa
Inatsisartut ataatsimiiittarfiata oqoqarnera pissutigalugu inatsisartut upernaakkut ataatsimiinnerat sivikillineqaraluartoq, inatsisartut siulittaasoqarfiannit nalunaarutigineqarpoq, aalisarneq pillugu inatsisissaq aamma ilassutitut aningaasaliissutissatut siunnersuut aammma aningaasaqarnikkut ingerlatsineq pillugu nalunaarut, inatsisartut maannakkut ataatsimiinneranni oqaluuserineqarumaartut, inatsisartut siulittaasuata Josef Motzfeldtip ippassaq radioaviisimi oqaatigaa.
Siumup inatsisartuni ilaasortaatitai tusagassiuutinut nalunaaruteqarlutik uppernarsillugu nalunaarput, inatsisartut siulittaasoqarfiannut nalunaaruteqarsimallutik inatsisartuni oqaluuserisassanngortitartik Kalaallit Nunaanni aatsitassap piiarneqarsinnaasup suulluunniit uran-imik akuata 0,1 procentimut qaffasinnerpaaffilerneqarnissaanik Naalakkersuisut peqquneqarnissaannik Inatsisartut aalajangiiffigisassaattut siunnersuutertik kinguartillugu.
Uraani pillugu Naalakkersuisut innuttaasunik ataatsimiititsisarnissamik neriorsuutigisimasaat piviusunngorniassammat, aalajangiisoqartinnagu, oqallittoqarnissaa aamma innuttaasut peqataanissaat siunertarineqarmat, siunnersuut kinguartillugu, Siumup inatsisartuni ilaasortaatitai tusagassiuutinut allagaqarlutik taama allapput.
TV-kkut aallakaatitassiat atorlugit Naalakkersuisut paasisitsiniaasimanerat naammagineqanngilaq, innuttaasunillu ataatsimiititsisoqarani.
Naalakkersuisut ippassaanikkunni tv-kkut aallakaatitsinermi oqaatigaat Kuannersuarni aatsitassani pineqartumi uranimik akoqassuseq 0,1 procentimit qaffasinnerusoq tamatumalu aaliangiiffigisassatut siunnersuut aappassaaneerneqartinnagu uppernarsarneqarnissaa pisariaqartinneqartoq, Siumup inatsisartuni ilaasortaatitai taama allapput.