Urani pillugu oqallinnissaq kinguartippaat
Inatsisartut ataatsimiittarfiani oqoqarnera pillugu upernaakkut ataatsimiinnissat ullui kingulliit ikilineqarput. Tamannalu pillugu oqaluuserisassanik kinguartitsisoqarsinnaasoq Inatsisartut siulittaasuannit Josef Motzfeldtimit oqaatigineqarpoq.
- Oqaluuserisassat inuiaqatigiinnut ajoqutaanngitsumik nukingernartuunngitsullu kinguartinneqarsinnaapput, josef Motzfeldt oqarpoq.
Taamatullu pisoqarnerani oqaluuserisassanik pingaarnersiuisoqartariaqartoq Inatsisartut siuliuttaasuata oqaatigaa, oqaluuserisassallu pingaaruteqartut pingasuusut ima oqaatigalugit.
- 2010-p ingerlanerani aningaasaqarnermi ataatsimiitsitaliamik akuersissutigineqarsimasut inatsisartuni akuerineqarnerisa oqaluuserineqarnissaat pisariaqarpasippoq, taavalu ukiumoortumik pinngitsoorani oqaluuserineqartartut ilagivaat aningaasaqarnikkut ingerlatsinermi nassuiaat, kiisalu aalisarnermi inatsisissaq nutaaq upernaarmanna pinngitsoornani naammassiniarneqartussatut isikkoqarput, Josef Motzfeldt oqarpoq.
Inatsisartuni ataatsimiinnerit kommunep ataatsimiittarfiani sapaatip akunnerata tulliani ingerlanneqarsinnaasut, Inatsisartut siulittaasuata Josef Motzfeldtip oqaatigaa.
Josef Motzfeldtip ilanngullugu aamma oqaatigaa ullut ataatsimiiffissat sinneruttut sisamat unitsinneqaannaratik ikilineqartut , sulisut Namminersorlutik Oqartussat qitiusumik allaffeqarfianni sivisunerusumik sulinnginnissaannik tunngaveqartoq.