Urani pillugu oqallinnermi IA-kkormiut puupput

Siumukkormiut Inatsisartuni ilaasortaatitatik ataatsimoortinniarlugit ilungersorput, susassaqarfimmullu oqaaseqartartoq Kim Kielsen aningaasaqarnermullu naalakkersuisoq Vittus Qujaukitsup illuatungiliuttut appilasuuttaqattaarpaat.

-Innuttaasut inuiaqatigiillu aatsaat taama avissaartuussimatigitillugit takuakka, aamma Inatsisartunut ilaasortat apeqqummi pingaaruteqarluinnartumi paasissutissanik pisariaqatunik pisariaqartunik pigisaqaratik taasitinniarneqarnerat aatsaat nalaappara, Juliane Henningsen IA-meersoq nassuiaavoq.

Siumup oqaaseqartartua isumaqarpoq illuatungiulittut ersisaariniarsarisut, namminerli tamakkunannga sunnertinnani.

-Ersisaarutisi uanga soqutiginngilakka. Tunngaviusumik aalajangernissaq pineqarpoq, Kuannersuit pineqanngillat, Inatsisartuni oqalugiartarfimmit oqarpoq.

Randi Brobergip Hans Enoksenillu atorunnaarsitsinissamut itigartitsillutik taasiniarlutik nalunaaruteqarnerisigut akerliusut siunnersuutip itigartinnissaanut taasinermik ataasiinnarmik amigaateqalerput. Suminngaanniissanersorli apeqquterujussuuvoq.

Anders Olsen nalunaarpoq partiiminut tunuliaqutsiiniarluni, Kristian Jeremiassenili qanorpiaq taasissanersoq nalorninalaarsinnaalluni. Innuttaasunik taasititsinissamiut uranimullu akuersaanngilluinnarnissaq pillugu KNR-imit toqqaannartumik aperineqarami qungujulaarluni akiinnarpoq: Taanna oqaaseqarfigissanngilara.