Assi: KNR

Kim amma Sara: Urani aaqqiagiinngissutigigaluarlugu suleqatigiissinaavugut

Kuannersuarni Greenland Minerals Energy aamma Killavaat Alannguanni Tanbreez piiaanissamut akuersissummik piaartumik tunineqarnissaannik Kommuni Kujalliup piumasaa partiit annerit marluk siuttuisa ippassaq oqallinnerminni neriorsuutigisinnaanngikkaat erserpoq.

-Malittarisassat malillugit suliat ingerlanneqarput, aatsitassarsiornermi inatsit naapertorlugu akuersissummik pissagaanni piumasaaatit naammassisariaqarpaat, Siumup siulittaasua Kim Kielsen taama oqarpoq.

Qinnuteqaat Killavaat Alannguannut tunngasoq ukiuni tallimani uninngasimavoq Kuannersuarnullu tunngasoq ullut 1.300-t sinnersimalerpai. Paamaarunneqarnissaalli siunertarineqanngitsoq aatsitassarsiornerlu inuussutissarsiornermi nunatta sukarsuisa ilagilissagaat Kim Kielsenip erseqqissaatigaa, kujataanilu innuttaasut 6700-t missaanniittut akornanni 500-t suliffissaleqisut tikkuarlugit:

-Aporfik urani. Uranisiorniannginnatta Siuminngaanniit erseqqissumik oqaatigissavarput, nunanuku sananeqaatai qaqutigoortut qallorniarneqartut. 

AAMMA ATUARUK Uranip isummerfiginissaa tunuarsimaarfigineqartoq

Inuit Ataqatigiit siulittaasuata Sara Olsvigip aatsitassarsiornermut tunngatillugu Siumullu suleqatigiinnerminni urani pinngikkaluarlugu allatigut siuariartortitseqatigiissinnaanertik takutissimanerarlugit:

-Isumaqarpunga aporaaffissagut siulliunnatigit suleqatigiissimanitta takutikkaa uranisiunngikkaluarluta siuariartorluarsinnaasugut.

Aatsitassat aporfissartaqanngitsut siulliullugit qallorneqarnissaat IA-p siulittaasuata orniginartinnerullugu taavaa aatsitassarsiornermilu akit allanngorarnerat nunallu tamalaat akornanni qanoq ineriartornissaat nalorninartoq eqqaasitsissutigalugit.

-Taamaammat una apeqqut nalorninartoq kisimi aallunnagu allanik inuussutissarsiornikkut ineriartortitassanik aatsitassarsiornikkullu allanik aallutaqarnerusariaqarpugut.

Isummersuutit