Upernavimmi tuniluuttoqarsorineqartoq
Upernavimmi tuniluuttoqarnissaanut ilimanaateqarpoq.
Tunillatsissimasut Upernavimmiittut arlallit tunillatsissimarnertik allanillu tunillaasinnaanertik suli nalullugu kaffillertuni assigiinngitsuni sisamani peqataasimapput.
Nunatta Nakorsaaneqarfia tusagassiuutinut taama nalunaaruteqarpoq.
AAMMA ATUARUK Upernavimmi tunillatsissimasut pingasut
Mattusimanissamik kaammattuuteqartut
Katerisimaarnernullu pineqartunut peqataasimasut allat amerlangaarmata, Coronamut allatseqarfiup inunnik ataasiakkaanik ujaasinissani attaviginninnissanilu ajornartissimavaa.
Taamaammat katerisimaanernut arlalinnut peqataasimasut tamarmik nammineq kajumissutsimik mattusimalernissaannik, peqataanermiillu ullut arfineq-marluk qaangiutereerneranni tunillatsissimannginnermik misissortinnikkut paasineqarnissaanut mattusimaannarnissaannik kaammattorneqarput.
Tasiusaq
15. juuli – Kaffillerneq nereqatigiinnerlu
Upernavik
17. juuli – Katittut kaffillernerat
20. juuli - Kaffillerneq
21. juuli – Kaffillerneq
Nunatta Nakorsaaneqarfiata taamaliornermi eqqorneqartorpassuussasut ilisimavaa, Upernavimmili tuniluunneq siaruatsaalissappat, pineqartut tamarmik mattusimanissamut kaammattuummut malittariaqartut, nakorsaneqarfik allappoq.
Upernavimmi misissuineq
Upernavimmi misissortinnissamik neqerooruteqartoqarpoq. Peqqinnissaqarfimmut oqarasuaatikkut normumut 96 49 13-imut piffissamik inniminniisoqarsinnaavoq.
Qanillisimasut Covid-19-imut ersiuteqarnerlutik immikkut maluginiassavaat, tunillatsisimasumut qanillisimanermiit ullut 14-it angullugit eqqumaffigissallutigit.
Ullut arfineq-aappassaanni misissortinneq tunillatsissimannginnermik takutitsigaluartoq, mianersortuarnissaq ersiutaasinnaasullu pillugit eqqumaffiginninnissaq pisariaqartoq, oqartussat allapput.
AAMMA ATUARUK Første coronasmitte i Upernavik: Det er overraskende, men ikke bekymrende
Eqqaamajuk
Kikkut tamarmik angalaarnissartik killilersimaassagaat kaammattuutaavoq aamma qanimut attaveqarnermi amerlassutsikkut sapinngisamik ikinnerpaaffianiitinniarnissaa pillugu.
Peqatigitillugu innuttaasut tamarmik ersiutaasinnaasunik maluginiagaqarnissaannik kaammattorneqarput siunnersuutillu nalinginnaasut eqqaamaqquneqarput:
- Napparsimaguit angerlarsimaannarit misissortillutillu
- Assatit asakulakkit imaluunniit håndsprit atoruk
- Talivit peqiffianut tangajorit quersorilluunniit
- Assannik eqitsinaveersaarit, kuniuinaveersaarit pakkussinaveersaarillu – qanillilluni attaveqarneq killilersimaaruk
- Eqqiluisaarnissat eqqumaffigiuk – angerlarsimaffimmi suliffimmilu
- Qanillinaveersaarit allallu mianersoqqullugit