Upernavimmi tunillatsissimasut pingasut
Inuit pingasut covid-19-imik tunillatsissimasut tallimanngornermi Upernavimmi paasineqarput. Upernavimmi maanna tunillatsissimasut katillugit sisamaapput.
Upernavimmi tunillatsissimasut qanimut attaveqartut marluk covid-19-imik tunillatsissimasut ullumi paasineqarpoq, tamarmillu ippassarli angerlarsimaannalereersimallutik. Tunillatsissimasut pingajuat tunillatsimasunut toqqaannartumik attaveqartuunngilaq. Tuniluunnerup paasiniarnera ingerlanneqarpoq.
Inuit pingasut covid-19-imik tunillatsissimasut tallimanngornermi Upernavimmi paasineqarput. Tasiusami katerisimaanermi tuniluuttoqarsimanera tuniluunnerup paasiniarnerata takutippaa, taamaammaat katerisimaarnermi najuussimasut tamarmik Corona pillugu Allatseqarfimmi attaveqarfigineqaleruttorput.
AAMMA ATUARUK Coronamik marluk tunillanneqarsimasut: Qaqortumi ataaseq Upernavimmilu ataaseq
Nakorsaaneqarfik taama nalunaaruteqarpoq.
Tasiusami innuttaasut tamarmik misissortinnissamik neqeroorfigineqarput, tamanna aqagu arfinningorpat nal. 12.30 Kiffartuussivimmi ingerlanneqassaaq.
Upernavimmi innuttaasut ersiutillit misissorneqarnissaannik neqeroorfigineqarput, tamanna arfininngornermi nal. 09.00-up 12.00-ullu akornanni Peqqissaavimmi ingerlanneqassaaq. Misissortinniaraanni oqarasuaatikkut 96 49 13-mut sianernikkut piffissamik inniminniisoqassaaq.
Misissortikkiartortut tamarmik qanermut assiaquteqarnissaat qanillinaveersaarnissaallu kaammattuutigineqarpoq.
Tunillatsissimasumut qanillisimasut angerlarsimaannassapput
Tunillanneqarsimasumut qanillisimasut ullut arfineq-marluk angerlarsimaannassapput, ullullu arfineq-aappassaanni misissortinnikkut tunillatsissimannginnerat uppernarsarneqarnissaata tungaanut angerlasimaannartussaallutik.
Kikkut tamarmik qanillinaveersaarnissaat kaammattuutigineqarpoq, taamaaliornikkut tunillatsissimasumut qanimut attaveqartut ikinnerpaaffissaaniitinneqarsinnaammat.
Ilutigalugu innuttaasut ersiuteqarnerlutik eqqummaariffigissagaat kiisalu innersuussutit nalinginnaasut malinnissaat kaammattuutigineqarpoq.
Qanillinaveersaarit, assatit asakulakkit, tangajussatillutit/quersussatillutit talivit peqittarfianut tangajorit/quersorit, ersiuteqaruit imalunniit covid-19-imik tunillatsissimasumut qanillisimaguit angerlarsimaannarit misissortikkiartorlutillu.