Coronamik marluk tunillanneqarsimasut: Qaqortumi ataaseq Upernavimmilu ataaseq
Suli marluk coronavirusimik tunillatsissimasutut paasineqarput. Nunatta Nakorsaaneqarfia ippassaq sisamanngornermi unnukkut taama paasissutissiipput.
Qaqortumi ataaseq Upernavimmilu ataaseq tunillatsissimapput.
Upernavimmiittoq sumi tunillatsissimanersoq maanna ilisimaneqanngilaq, ullunili arlalinni napparsimasimavoq, Upernaviulli eqqaani juulip ulluisa 13-ianniit 17-iata tungaanut Tasiusamiissimalluni.
Qaqortumiittoq tunillatsissimasumut qanillisimasuummat, qanoq tunillatsissimanera ilisimaneqarpoq.
Taakku marluk angerlarsimallutik maanna mattusimapput.
Peqqinnissaqarfiup Upernavimmi misissuinerusinnaalernissaq maanna sulissutigaa, innuttaasunillu ersiutilinnik misissuineq ulluni aggersuni aallartinneqarsinnaassalluni.
Tamatuma tungaanut tunillatsissimasup qanillisimasai misissorneqarnissamik neqeroorfigineqarput. Tunillatsissimasumut qanillisimasut Corona pillugu Allatseqarfimmit attavigineqarumaarput.
Upernaviup eqqaani nunaqarfimmi Tasiusami innuttaasut misissorneqarnissamik sapaatit akunnerata naanerani neqeroorfigineqassapput. Piffissaq sumiiffissarlu kingusinnerusukkut nalunaarutigineqarumaarpoq.
