Upernavik siullermik coronarfiusoq: Tupannarpoq ernumanngilagulli

Upernavimmi inuk ataaseq coronavirusimik tunillanneqarsimasoq sisamanngornermi paasineqarpoq. Tunillagaq Upernaviup Avannaani Tasiusamiissomavoq.

Inuit tupattut aammali eqqissisimasut KNR-imiit oqaloqatigut oqarput.

Inoqarfinnilu taakkunani misissuisoqalersoq, peqqissutsimut naalakkersuisoq KNR-imut oqarpoq.

AAMMA ATUARUK Coronamik marluk tunillanneqarsimasut: Qaqortumi ataaseq Upernavimmilu ataaseq

- Napparsimavimmut sianilereersinnaapput misissortinnissamut inniminniillutik. Soorunalimi kikkulluunniit sianersinnaapput, kisianni ersiutillit salliutinneqassapput, Peqqissutsimut naalakkersuisoq Kirsten Fencker oqarpoq.

Covid-19-imik tunillanneqarsimasoq tunillanneqarsimanera Upernavimmiitillugu pasineqarpoq. Taannali tunillanneqarnerminik suli ilisimasaqalertinnani aamma Tasiusamiissimavoq.

Tasiusamili innuttaasut ilaat uippalleratik eqqissisimapput, maleruaqqusanillu malinninnissaminnik pingaartitsillutik.

- Tupannarpoq soorunami. Nappaat kimulluunniit tussinnaagami, nalugatsigu qaqugukkut takkutissanersoq. Kisianni qujanartumik eqqissisimarpasippoq, Tasiusami innuttaasut ilaat, Karl Erik Danielsen oqarpoq.

Upernavimmi Tasiusamilu mianersussasut

Peqqissutsimut naalakkersuisup oqarnera naapertorlugu misissuiartortussat tallimanngornermi Upernavimmut tikinnissaat misissuinissaallu pilersaarutaavoq. Tasiusamilu arfininngornermi misissuisoqassalluni.

Taamaammat innuttaasut misissortittoqarnissaata tungaanut mianersornissaannik, Kirsten Fenckerip kaammattorpai.

- Paasisinnaavakka ernumasut, taamaattumik massakkut pingaaruteqarluinnarpoq nakorsaanerup innersuussutai malinneqassasut. Ersiuteqaraanni angerlarsimanissaq, inunnut akulerusimannginnissaq, assaat errortukulanissaat inuillu takusartakkat ikinnerpaaffimminiitinnissaat, Kirsten Fencker oqarpoq.