Upernavimmi qilalukkat qernertartassat ilaneqarput

Ukiumoortumik pisassiissutaasut 81-iusut tamakkerneqarmata, Qimusseriarsuarmi piniartut, aqutsiveqarfiup Upernaviup iluaniittut, qilalukkanik qernertanik 30-nik pisasseqqinneqarput.

Uumassusilinnik ilisimatuut Pinngortitaleriffimmeersut tusarniaanermi akissuteqarlutik pisassiissutit ilaneqarnissaat mianersoqqussutigigaluarpaat.

- Qimusseriarsuarmi qilalukkanik qernertanik pisassiissutit 30-nik ilaneqassapputata ukiut tulliuttut tallimat ingerlanerini amerliartorsinnaanissaminnut periarfissaat 50 %-iussanngilarluunniit, Pinngortitaleriffik tusarniaanermi akissuteqaammini taama allappoq.

Naalakkersuisut immikkut pisassiinermikkut  Upernaviup nunaqarfiini Savissivimmilu piniartut isertitaqarnissaannik periarfissinniarpaat. Taakkumi maannakkorpiaq puisit amiinik tunisisinnaanngikkallarput. Upernavimmi taamatullu nunaqarfiini Savissimilu puisit amiinik tunisineq matoqqavoq. Puisit mamaarnerisa nalaani puisit amiinik tunisineq uninngatinneqarpoq qaleralinnillu tunisineq sumiiffinni arlalinni aamma matoqqalluni.

Qilalukkanik qernertanik 30-nik pisasseeqqinnissamik siunnersuuteqarnermi piumasaqaataavoq taakkunannga 20-t piniariaasitoqqat atorlugit – tassa qaannamik piniarneqassasut aallaaneqartinnagillu naalinneqartassasut. 20-it Savissivimmi, Kullorsuarmi Nuussuarmilu piniartunut immikkoortinneqarput.

Pisassiissutinut ilassutaasut sinneri 10-it, Qaasuitsup Kommunianut aqutsiveqarfik Upernavimmi agguaassassanngortinneqarput.

Upernaviup pigisaanut pisassiissutaasut 81-iugaluarput, taakkunannga 18-it Savissivimmut immikkoortinneqarsimallutik. Taakkulu ataatsimiititaliarsuup Kalaallit Nunaata Canadallu ataatsimoorussaata inassuteqaateqarnera naapertorlugu aalajangersarneqarsimapput, uumassusilinnillu ilisimatuut naatsorsuineri malillugit qilalukkat qernertat amerliartorsinnaanissaminnut periarfissaat 70 %-iussaaq.