VIDEO Upernavimmi kunngikkormiunik naapitseqqinneq
- Ullut tamaasa qiviartarpakka, Karen Geisler KNR-imut kunngikkormiut assii pillugit taama oqarpoq.
Ullullu tamaasa isigisartakkani ataqqeqai. Taakkumi 1960-imi Upernavimmut tikimmata takusimagamigit.
- Inussiarnersorujussuullutik Inngeri Frederillu, kalaallisoorami Inngeri, ila alutornaqaat, Karen Geisler oqaluttuarpoq.
Aamma atuaruk VIDEO Ukkusissani utoqqaanersaat kunngikkormiunik pulaartoqarpoq
Karen Geislerip pania meerannguulluni, maannakkut dronningiusup, prinsesseulluni tasiorsimammagu anaanaasup tanngassimaarutigaa.
- Angajoqqaajulluni ila, qanoq oqassuunga, tuppallernaqaaq. Aamma perruualaarami assut taanna taamanikkut meeraq. Tasiortikkami kunngissamit, taamanikkut Makkaritta kunngissaasoq, Karen Geisler oqarpoq.
Aqagunngornissaanut pissangasoqarpoq.
- Kijuulilerlunga kusanartorsuarmik akuuniarpunga tappikani, eqqaani, pissanganaqaaq, Karen Geisler oqarpoq.
Ulloq qallivoq, Ataqqinartorsuarmillu takunini Karenip attortissutigeqaa.
- Nuanneqaaq, qullilingajasimavungaluunniit. Qamuuna tuppallingaarama, tuppalleqaanga, Karen Geisler oqarpoq.
Karen 82-iliisussaagaluarluni, sapaatip akunnerata tulliani, suli dronningip takoqqissinnaanissaanut neriuuteqarpoq.
- Neriuppunga suli ukiut amerlanerusut peqqitsitaaguma aamma takoqqissinnaallugu, Karen Geisler oqarpoq.