Upernavimmi innaallagiaarunnera innuttaasunut akisuvoq

Nukissiorfinni innaallagissiornermut pisortaq, Niels Heilmann, unnuaarulluni sulisoq, suliap sumut killinneranik oqaluttuarpoq:

- Illoqarfiup ilaannaa maanna sarfaqartipparput sarfalersuutigut killeqaramik. Qanoq annerutigisumik sarfaliisinnaanerluta qullilerisut ikiortigalugit misissorparput, Niels Heilmann oqarpoq.

Taassuma angerlarsimaffik innaallagiaqanngitsoq tujorminarnerarpaa.

- Qiianarpoq, suullu tamarmik qaminngallutik. Igasinnaanatalu uunnaasinnaanngilagut, Niels Heilmann oqarpoq.

Markus Christensen Geisler, Upernavimmi taxartartutut sulisoq, saniatigullu qatserisartuusoq, aamma tujormeqaaq.

- Suli tassa sarfaqanngilagut. Campingsættit atorlugit allatut ajornartumik uagutsinni uunartuliorpugut igallutalu, oqarpoq.

Innaallagiaqannginnerup kinguneranik annaasaqarput.

- Qerisuutigut qeqartoornissatsinnut katersagut ernumassutigisimavakka. Pissarsiariniarneri aningaasanik naleqanikuummata. Ilai aapput allatullu ajornartumik annaavagut. Qullukkat assigiinngitsut, mattaat aamma puisit neqai. Uaguinnaanngitsoq tamaani qerisuutiminnik annaasaqarsimassapput , Markus Christensen Geisler oqarpoq.

Markus Christensen Geislerikkut juunip ulluisa 28-ianni apersortitsissapput. Tungaanullu puisip neqissarsiniartariaqassallutik aamma oqaatigaa.

Upernavimmi innaallagissiuut Uummannameersumik ilallugu maanna illoqarfimmi tamakkiisumik pilersuisinniarneqarpoq. Ualiartoq iluatsikkaluarluni suli pilersuineq aalaakkaalinngitsoq oqaatigaa.

Nukissiorfiit nalunaarutigaat ualimut sillimmatitut innaallagissiuutigineqartut ilaat ikuallalerluni pujortorujussusanngoraluartoq. Tamatuma kinguneranik taanna qaminneqartariaqarsimavoq, maannalu Upernavimmi illut pingajorarterutaat innaallagiaqanngillat.

Nukissiorfimmi tusagassiisartoq Louise Johansson oqarpoq, maanna innaallagissiorfimmik oqilisaasussatut sillimmatigineqartoq kisimi innaallagissiuutigineqartoq.

- Illoqarfiup tamarmi innaallagissamik pilersorneqaqqilernissaa maanna ilungersuutigineqarpoq, Louise Johansson oqarpoq.

Tamatuma saniatigut containerit innaallagisuutit pingasut sinerissamit Upernaviliaanneqarnissaat ullumi aalajangiunneqarpoq.