Upernavimmi angut coronaqarluni toqusoq
Angut utoqqaq covid-19-imik tunillatsissimalluni toqukkut qimaguppoq.
Nunatta nakorsaaneqarfiat tusagassiuutinut nalunaarummi allapput.
- Kalaallit Nunaanni Coronamik toqquteqartoq siulleq toqukkut qimaguppoq. Angut utoqqaq Upernavimmeersoq, Upernaviup Peqqissaaviani uninngasoq COVID-19-imik toqquteqarpoq.
Upernavimmi nunaqarfiinilu coronavirus sapaatit akunnerata siuliani sukkasuumik tuniluuppoq, maannali tunillaassuunnerup aallaaviinik oqartussat misissuileruttorput.
Naatsorsuutigineqartoq piviusunngortoq
Nunatsinni covid-19-imik toqquteqartoqarumaartoq nunatta nakorsaanerata Henrik L. Hansenip naatsorsuutigereerpaa.
- Ajoraluartumik maani nunatsinni tuniluuttoqarnerani naatsorsuutigineqarluinnartutut nappaat inuunermik akeqartartussanngorpoq aammalu nunarsuarmi sumiiffinni allanisulli ineriartulerluni, Henrik L. Hansen oqarpoq itisiliillunilu:
- Nunatsinniittut tamaasa akiuussutissamik kapiteqqullugit aammalu tuniluunneq pinaveersaarniarlugu maleruagassanik tunngaviusunik malinneqqullugit kaammattuinnarsinnaavakka. Tamanna napparsimaruluttut amerlassusissaannik killilersuiniarnermut amerlanerusullu toqunissaannik pinaveersaartitsinermut pitsaanerpaavoq.
Peqqinnissaqarfik ilungersunartorsiortoq
Nunatsinni covid-19-imik tunillanneqarsimasut sapaatini akunnerni kingullerni aatsaat taama amerlatigipput. Nunatsinni coronavirusertut maannakkut 167-it naalakkersuisut nittartagaani nun.gl-imi nalunaarsorneqarsimapput.
Tamannalu peqqutaalluni suliaritittussat perulunngitsut aatsaat aappaagu februaarimi suliaritissasut, peqqinnissaqarfik ilisimatitsivoq.