Telepost: Upernavimmi allakkat agguaanneqartarunnaalerput
- Allakkat ikiorpaalorujussuarni ikiliartorujussuarlutik ineriartorsimapput. Oqaatigisinnaavara 2001-iminngaanniit 2018-imut 65 procentinik appariarujussuarsimammata. Taamaattumik aalajangersimavugut, misiliutitut Upernavimmi agguaassisarunnaarnissaq aallartinniarlugu, Telepostimi allakkanut nassiussanullu pisortaq, Nino Fencker oqarpoq.
Taassuma allakkat 2.000 kilot missaannik oqimaassusillit TelePostip Upernavimmi allakkeriviatigut ukiumut nassiunneqartartut ilisimatitsissutigaa. Allakkallu amerlassusaat nunatta sinneranut sanilliullugit amerlavallaanngitsut, Nino Fenckerip oqaatigaa.
- Nunarput tamaat isigissagaanni, taakkua 190.000 kiiiluupput. Taamaattumik allakkat eqqartorneqartut tassunga naleqqersuutissagaanni annikitsuaraapput
Allaanerungaarnavianngitsoq
Nino Fenckerip oqarnera naapertorlugu Upernavimmi allakkanik agguaassisoqartarunnaarnera innuttaasunut allannguutaavallaarnavianngilaq.
- Upernavimmi nalinginnaasuuvoq, nammineerluni allakkerivimmut aperiartortarneq allagarsiassaqarluni. Taassuma saniatigut aamma allakkat anginerit tamaavimmik tikikkaangata SMS-ikkut e-mailikkullu nalunaarutigineqartarput, Nino Fencker oqarpoq.
Taassuma internetti allakkanik nassiussisarnermut allatut periarfissaqartitsisoq nassuiaatigaa.
- Tamatta arlaannut nalunngisatsinnut nalunaarniaraangatta allataqarniaraangattaluunniit Facebook, Messenger, SMS e-mailillu immaqa massakkut atornerujussuuvagut.
Taamaammat allakkat amerlanerpaartaat oqartussanit nassiussaasarput.
- Agguaassortakkagut amerlanersaat pisortanit suliffeqarfinninngaanneersuupput. Inummiit inummut allagarsiassat massakkut tammarluinnangajannikuupput, telepostimi allakkanut pisortaq oqarpoq.
Taassuma oqartussat qarasaasiatigut allakkanik aappaagu apriilimiit nassiussisalernissaata atulersinneqarnissaa aamma oqaatigaa.
- Taava tassani allakkat suli annertunermik ikilerujussuarnissaat naatsorsuutigaarput.
Ineriartorneq malinnaaffigineqartoq
Upernavik eqqaassanngikkaanni sumiiffinni allani allakkanik agguaassisarnerup atorunnaarsinneqarnissaanut piffissami matumani pilersaaruteqartoqanngitsoq, Nino Fenckerip oqaatigaa, nangillunili:
- Ineriartorneq malinnaaffigissavarput. Taavalu tassa arlaatigut nalilersoqqissaartariaqassavarput, allani illoqarfinni aamma agguaasarunnaarnissaq qinnuteqaatigineqassanersoq, Telepostimi allakkanut nassiussanullu pisortaq Nino Fencker oqarpoq.
Telepostip allakkat Upernavimmi agguaanneqartarunnaarnissaat Naalakkersuisunut qinnuteqaatigaat, tamannalu Naalakkersuisut oktobarip 18-ianni akuersissutigalugu.
