Upernavik Seafoodip tunisassiorfini ammaqqippai
Upernaviup eqqaani aalisakkanut tunitsiveqarsinnaaneq pillugu pinnaanneq unikkallarpoq.
Upernavik Seafoodip tunitsivii ulluni qulini matoqqareerlutik ammarneqaqqipput. Taamaasilluni Upernaviup eqqaani tunitsivigineqarsinnaanermut tunngatillugu pernaannermi Upernavik Seafood ajungaavoq.
Upernavimmi qaleralinniat Upernavik Seafoodimut tuniseqqissinnaalerput suliffeqarfiullu suliffissuaataanni sulisut 200-t suleqqilersinnaallutik. Halibut Greenland A/S-imi pisortap Daniel Skiftep oqarnera malillugu unammillertaat, Halibut Greenland tunitsiviliigaluartoq, peqquneqarpoq umiarsuaq tunitsivik "Rubin" Upernaviup eqqaaniissanngitsoq taamaammallu maanna Ilulissiartinneqarluni.
- Aalisartunut ajoraluaqaaq, kisianni Upernavik Seafood tassa naalagaasimavoq, Daniel Skifte narrutsassimasoq oqarpoq.
Illuatungerisaa, Upernavik Seafoodimi siulersuisuni siulittaasoq Lars-Emil Johansen, oqarpoq "Rubin" Upernaviup eqqaanut inissilluni tunitsivigineqaleraluarnera kukkunerusoq.
- Umiarsuaq tunitsivik aalisarfigineqanngitsuniinnissaminut akuersissummik peqarpoq. Taamaakkaluartorli "Rubin" uagut tigooraaffigilluarnerpaaffitsinnut inissikkaluarpoq taamaammalluuna taama sakkortutigisumik periartugut, Lars-Emil Johansen oqarpoq.
Umiarsuup tunitsiviup akuersissut pigisaa Daniel Skiftep allatut paasivaa. Akuersissummi allaqqasutut Upernavik Seafoodip tunitsiviisa avataaniissanngilaq.
Aalisartut Upernavimmeersut Upernavik Seafoodip inissisimaffini atornerlussimagaa oqarput. Lars-Emil Johansen aamma isumaqarpoq pingaarutilimmik inissisimaffeqarlutik, taamaattorli akisussaaffitsik nalunngikkitsik oqaatigalugu.
- Ukioq naallugu tunitsiviuvugut aalisarnermillu suliat arlalissuit aningaasaliinikkut peqataaffigalutigit soorlu aalisartut atortussaminnik allanillu pitsaasumik atugassaqartinneqarlutik pisisinnaatinneqartut, nassuiaavoq.
Matusigaluarnerli isigineqarnikkut innarliimmat siulersuisuni siulittaasup oqarnera malillugu sapaatit akunnerini kingullerni pisut paasisitsiniaanikkut aalisartunut nassuiaatigineqarumaarput.
