Upernavik misissuiffissatut piukkunneqarpoq

Uuliasioqatigiiffissuaq Maersk Oil Kalaallit Nunaata sineriaani uuliaqarneranik perngaammik misissuisussanngorpoq.

Baffinip Kangerliumarngani uuliaqarneranik misissuisussat uuliasioqatigiiffissuit arfineq-marluusut ilaattut Maersk Oil akuersissummik tunineqaqqammerpoq.

Maersk Oilip misussuiffissaa Upernaviup avannaata kitaaniittoq 12.000 kvadratkilomerterisut annertutigaaq. Maersk Oilimit oqaatigineqarpoq tamanna ilimanaateqarluartuusoq:

- Tamaani misissuinissatsinnut akuersissummik tunisinnerput nuannaarutigeqaarput. Upernaviup avannaata kitaa ilimanarluartuusoq upperaarput. Tamaani immap naqqata pissusaa eqqarsaatigalugu nassaartoqarnissaanik periarfissaqarluarmat, Maersk Oilimi misissuinermi pisortaq, Lars Nydahl Jørgensen oqarpoq.

Immap naqqanik sajuppillatitsilluni misissuinissat, paasisanillu katersineq Maersk Oilip suliassarissavaa. Siullertulli suliassaminnik erngerluni aallartinneqartussamik pilersaaruteqarput:

- Misissukkanik laboratorialiornissarput suliassatta pingaarnersaraat, uuliasiorfiit allat aamma Kalaallit Nunaanni naalakkersuisut misissuinissaminni atorsinnaasaannik, Lars Nydahl Jørgensen oqaluttuarpoq.

Misissuiffissap suna siunertarineraa ima oqaluttuaraa:

- Immap naqqata pissusaanik ilisimasanik katersinermi laboratoria atorneqassaaq. Paasisat nutaat erngerluni paasiniarneqarnissaat siunertaavoq, taamaalilluni misissugassat ungasissuliaateqqaarnagit misissorneqarsinnaassallutik, Lars Nydahl Jørgensen oqarpoq.

Maerskip uuliamik misissuinissaa Kalaallit Nunaata sumut iluaqutigisinnaavaa?

- Naatsorsuutigaarput suliffinnik pilersitsissalluta. Aamma sumiiffimmi

Attaveqarfinnik siuarsaanermut ikiuussinnaanissarput naatsorsuutigaarput. Taassuma saniatigut akileraarutit isaatinneqartut aamma iluaqutaanissaat naatsorsuutigalutigu, Lars Nydahl Jørgensen naggasiivoq.