Upernaakkut ataatsimiinnermi oqaluuserisasssat oqqassutaasut
- Inatsisartut ataatsimiilluta ullumi aallartikkutta, oqaluuserisassat minnerpaamik pingasut saaqqummiussimasagut ikkunneqarnissaat piumasarissavarput, Siumup siulittaasua, Aleqa Hammond, oqarpoq.
Inatsisartuni partiit tallimaasut oqaluuserisassanik katillugit 70-inik nassiussisimapput. Taakkunannga 22-it ilanngunneqarsimanngitsut, KNR-imiit partiit allattaannut sianeqqataarnikkut paasinarsivoq.
Siunnersuutit oqaluuserisassanut ilanngunneqassagunik aalajangersimasumik iluseqarnissaat piumasaqaataavoq.
Assersuutigalugu Namminersorlutik Oqartussat susassaqarfiisa iluaniissapput, erseqqissumik paasinartumillu oqaasertaqassallutik aamma nunat tamalaat isumaqatigiissutaannut aporaattussaanatik.
- Oqaluuserisassatut siunnersuutigisavut minnerpaamik pingasut ilusimikkut piumasaqaatinut tamakkiisumik naammassinnittumik suliarisimavavut, itigartitsissutigineqarnerannullu tunngavilersuutaasut akuersaanngilagut.
Siulittaasoqarfik Inatsisartunik partiinit annernit sisamaneersunit ilaasortaqarpoq siulittaasoq Inuit Ataqatigiinneersoq Josef Motzfeldt tallimmiullugu. Taannalu oqarpoq, siulittaasoqarfimmi isumaqatigiilluni siunnersuutit suliarineqartut.
- Siunnersuutit ilaat piumasaqaatinik eqqortitsinngitsut itigartittariaqarsimavavut. Tassalu taanna ilaatigut uggorineqaraluartoq, siulittaasoqarfimmi isumaqatigiilluta tamakkua itigartittariaqarsimavavut.
Siulittaasup erseqqissarpaa, siunnersuutit tamarmik assigeeqqinnaamik suliarineqarsimasut.
- Naalakkersuisuneerpata, partiineerpata, Inatsisartuneerpataluunniit malittarisassat malilluinnarlugit suliarineqartarput.
Siumut Atassullu Siulittaasoqarfimmi ilaasortaatitaqarput. Aleqa Hammond aperaarput, taakkua suliassatik iluamik suliarisimaneraat:
- Ikinnerussuteqartaramik. Oqaluuserisassanut ilanngutsikkusuttatta ilanngutsinneqarnissaat tamaviaarutigigaluaqai. Taamaammat Inatsisartutut periarfissarput atorlugu piumasaqaatigut saqqummiutissavavut.
KNR-imit sianeqattaarnermi paasinarsivoq siunnersuutinit 22-nit oqaluuserisassanut ilanngunneqanngitsunit 17-it illuatungiliuttut partiivinit, Siumumit Atassummillu nassiussaasut.