Upalungaarsimasut iliuutsiminnik allannguisut: Amerlanerusut coronaviruseqarnersut misisorneqassapput

Oqartussat iliuutsitik ullumimit allanngortippaat, inuillu amerlanerusut coronavirusimik tunillatsissimanersut misissorneqalissapput.

Nunatta nakorsaanera, Henrik L. Hansen tusagassiortunik ullumi katersortitsinermi oqarpoq.

- Amerlasuut misissugassamik ulluni makkunani tigusiffigineqarput. Peqqinnissaqarfimmut malittarisassaatigut allanngortippagut, amerlanerusullu misissorneqarnissaat innersuussutigalugu, nunatta nakorsaanera, Henrik L. Hansen oqarpoq.

Peqqinnissaqarfimmi sulisut oqartussat misissussagaat, nunatta nakorsaanerata oqaatigaa. Tassa sulisut Danmarkimiit Nuummut tikittut, Nuummiillu illoqarfinnut allanut nunaqarfinnullu ingerlaqqittut misissorneqartassapput.

LÆS OGSÅ Endnu en person er smittet med coronavirus: Nuuk isoleres

Tassalu sulisoq sulilertinnagu, tassannga misissugassatut tigusaq coronavirusimik tunillatsissimannginnermik paasissutisiissaaq.

Inuilli allat aatsaat coronavirusimik ersiuteqarunik misissorneqartarnissaat, oqartussat aalajangiusimavaat.

Nuummi nappaalasoqanngitsoq

Tunillatsissimasoq kingulleq angalaqqamminngilaq, taamaammat taanna Nuummi tunillatsissimasinnaavoq.

Tunillatsissimasutut pingasunngornermi paasineqartup tusarfigineraniili Tunillaassortunik nappaalanersuaqarneranut ataatsimiititaliarsuaq Danmarkimut timmisartuusisoqnngimmat allanik nutaanik akissutisinngilaq. Kisianni tamanna illoqarfiit pingaarnersaanni nappaalasoqariartorneranik, ataatsimiititaliarsuup isumannginnginnerarpaa.

 - Misissukkat ullumikkut suli akissutisinngilagut, tamannali tunillatsissimasorpassuaqaleriataarneranik isumaqanngilaq, taamaakkaluarpammi napparsimasorpassuussangaluarput, taamaattoqanngilarli, nunatta nakorsaanera, Henrik L. Hansen oqarpoq.

LÆS OGSÅ Alle ikke-akutte operationer udskydes på grund af coronavirus

Ilisimatusarfiup avatangiisaanit inersimasoq tunillatsissimasoq nakorsaanerup tusagassiortunik ullumi katersortitsisoqarnerani aamma oqaatigaa.

Tunillatsissimasoq kingulleq sapaatip-akunnerata naanera illoqarfissiorsimasoq oqallisigineqarpoq, taamaattoqanngitsorli, nakorsaanerup oqaatigaa.

- Inuk taanna imerniartarfinniissimanngilaq allaniluunniit soqutiginartuniissimanani, tamanna qularutissartaqanngilaq, Henrik L. Hansen oqarpoq.

Aningaasatigut ikiorsiissutit

Inuussutissarsiorneq piffissami kingullermi inerteqquteqarnernit, killilersuinernit innersuussutinillu eqqugaaqqapput, taakkununngalu ikiorsiissutissanik suliaqartoqartoq Kim Kielsenip tusagassiortunik ullumi katersortitsinermi oqaatigaa.

Ikiorsiissutilli qanoq imaqassanersut – kikkut qinnuteqarsinnaanersut – suli paasissutissiissutigineqanngilaq.

Illoqarfiit pingaarnersaata matuneqarnerata kingunerisaanit Nuummit aallariarsinnaajunnaaqqasoqartoq oqartussat ilisimavaat. Matumanilu kommunit oqartussallu taakkununnga aningaasatigut ikiorsiissuteqarsinnaanissaq sulissutigaat.

Corona pillugu sianerfissami unammillernartoqartoq

Oqarasuaat innuttaasut coronavirusi pillugu apeqquteqarusuttut sianerfigisinnaasaat marsip ulluisa 13-ianni pilersinneqarpoq.

Oqarasuaat sianerfissat utaqqisaaffiuvoq, Tunillaassortunik nappaalanersuaqarneranut ataatsimiititaliarsuullu oqarasuaatip ingerlatinniarneranut unammillernartoqangaatsiarsimasoq oqaatigaa.

LÆS OGSÅ Børn spørger corona-hotline: Kan vi gå ud og lege?

- Oqarasuaammik pilersitsinissaq nalunanngitsumik unamminarpoq, pissutigalugu akissuteqartartut suliaqarfigisimanngisaminnut akissuteqartussanngoriasaarput. Taamaammat inunnik eqqortunik pissarsiniarnitsinnut piffissangaatsiaq atorparput. Suliangaatsiaavoq, taamaammat iluamik suli ingerlalinnginnera paasisinnaavarput, nakorsaaneq Henrik L. Hansen oqarpoq.

Nuuk sapaatini-akunnerni pingasuni apriilip arfineq-pingajuata tungaanut matuvoq:

• Inuit amerlanerpaamik qulit ataatsimoorsinnaapput. Tamanna illup iluani silamilu atuuppoq. Tamanna maannamut 100-inut killeqarsimagaluarpoq.
• Inerteqquteqarneq pisortat ilaasartaataannut atuutinngilaq. Bussini issiavissat tamarmik atorneqarsinnaapput. Aamma pisiniarfinni inuit qulinit amerlanerusinnaapput.
• Ilinniarfeqarfiit ulluuneranilu paaqqinniffiit matupput. Atuarfiit tallimanngorpat aatsaat matusussaagaluarput – matusinerli ullumikkut sisamanit aallartissaaq.
• Nuuk Center matuvoq
• Qitigiartarfiit imerniartarfiillu matupput
• Neriniartarfiit aamma neriartortunut matoqqassapput. Taakkuli annissanik pisiniarfigineqarsinnaanissaat periarfissaassaaq.
• Timersortarfiit - matumani timigissartarfiit ilanngullugit matupput.
• Nuummiit aamma aallarsinnaanngilatit – aamma nammineq umiatsiannik. Aqisserniarsinnaavutit aalisariarsinnaallutillu – kisianni Nuummut angerlaqqittassaatit. Sumiiffinnut allamukaqqusaanngilluinnarputit.
• Pisiniarfiit ammaannassapput – pisinialli imminnut 2 meterinik ungasitsigisassapput.