Upalungaarsimanermut pisortaq: Utoqqaat ikuallattoqassagaluarpat isumannanngillat

Upernavimmi utoqqaat angerlarsimaffianni kaassuartakkaniinnaq ingerlasut, arfinillit, init quleriit qullerpaartaanni najugaqarput. Najugaqarfik ajornerpaamik pisoqartillugu ikuallalissagaluarpat taakkua torsuusaminniit silammut toqqaannartumik ataatsimik qimaaffissaqarput.

- Upernavimmi utoqqaat angerlarsimaffianni ikuallattoqalissagaluarpat, aap isumannaatsumik qimarngussorneqarsinnaanerat oqaatigisinnaavara, Avannaata Kommuniani upalungaarsimanermut pisortaq, Isak Pjettursson, KNR-mut oqarpoq.

Utoqqaat pitsorluttut ikuallattoqassagaluarpat isumannaatsumik anninneqapallassinnaanersut akissussaanerpaap, tassa Avannaata Kommuniani borgmesterip, attaviitsup, Palle Jerimiassenip KNR-mut sapaatit akunnerisa siulianni oqaatigisinnaanngilaa.

- Ulorianartorsiorlutik inissisimanissaannik oqariartorneq taanna akiuminaatsippara, sulinermut atugassarititaasut massakkut taamaattut aaqqiiviginissaannik suliaqaratta, attaviitsoq, Palle Jerimiassen KNR-mut oqarpoq.

AAMMA ATUARUK Borgmesteri Upernavimmi utoqqaat angerlarsimaffianni elevatori pillugu: Nukiit tamaasa atorpagut

KNR-ip utoqqaat illuanni elevatori pisoqaq pillugu siullermik sapaatip akunnerata siuliani saqqummiussivoq. Elevatori pisoqaangaarmat kingoraartissaanik pissarsiniarneq ajornakusoorluinnarpoq. Kingoraartissaanik maanna Italiami nassaartoqarnikuuvoq, iluarsaassisussanillu Upernavimmut oktobarip qiteqqunnerani tikittoqassaaq.

Tamanna borgmesterip innersuussutigaa - kisianni Inga Egedep oqarnera naapertorlugu utoqqaat elevatorimik taama sivikisutigisumik utaqqisussaanngikkaluarput.

Amaarneqarsinnaasut

Ikuallattoqassagaluarpalli ammut akiarneqarnissaat pilersaarutaanngilaq.

-Annissuinissaq sukkanerpaamik ingerlassappat qamutaat nassarnagit taakkua qamutiniittut amaarlugilluunniit ingerlanneqarsinnaapput sukkanerusumik, Isak Pjettursson oqarpoq.

Utoqqaat angerlarsimaffiata qulaani silammut qimaaffissiaq toqqaannartoq ataasiinnaavoq. Taassuma nalaani ikuallattoqassagaluarpat utoqqaat maanna akiarlugitammukartarfiatigut qimarngussuunneqassapput.

- Tassuunaarsinnaanngikkutta aamma illup ilua aqqutigalugu qimaaffissiatigut allatigut annissorneqarsinnaassapput, Isak Pjettursson oqarpoq.

AAMMA ATUARUK Utoqqaat angerlarsimaffianni elevatori ukiuni marlunni atorsinnaanngitsoq

Elevatori ikuallattoqassagaluarpat atorneqassanngitsoq upalungaarsimasut pisortaat aamma erseqqissaatigaa.

Najugaqartut kaassuartakkaniinnaq ingerlasut elevatorip ajornerani ineeqqanut ataaniittunut, qimaariataarnissamut periarfissagissaarnerusumut nuunneqarnissaannik utoqqaat illersuisuata kissaaternikuuvoq.

Tamannali Avanaata Kommuniani ilaqutareeqarnermut ingerlatsivimmi pisortap itigartippaa.

Upernavimmi utoqqaat illuanni najugallit katillugit 19-iupput, taakkunannga arfinillit kaassuartakkamik atuisuupput.

Angalanermini nalunaarusiaa maanna naammassineqangajalersoq KNR-imiit pissarsiaraarput.

Taassuma najugalinnit arlalinnit naammagittaalliuutinik apuussivigineqarnermi kingunerisaanik Upernaviliarsimanera nalunaarusiaani allaqqavoq.

Illersuisup nalunaarusiaani Upernavimmi utoqqaat angerlarsimaffianni elevatorip ukiuni marlunngulersuni ajornerani utoqqarnut kingunerluutit allanneqarput.

Pineqartut arfinillit nereqataasannginnermi saniatigut aamma najugaqartut allat isersimaartarfimmi ataatsimuualaaraangata aamma peqataatinneqarneq ajorput.