Upalungaarsimaneq amigaateqarpoq
Upalungaarsimaniarnerullu pitsaanerulersinnaanissaanut atatillugu innersuussutigineqartut pingaarnerpaat ilaat naammassineqarsinnaanngitsoq, Issittumi Sakkutooqarfiup pisortaa oqarpoq.
Umiarsuit alapernaarsuutit katillugit sisamaasut qulimiguulimmik tamarmik immikkut inissiivigineqartariaqartut, nalunaarusiami innersuussutigineqarpoq, alapernaarsuutilli Knud Rasmussen aamma Ejnar Mikkelsen qulimiguulinnut hangareqanngimmata, qulimiguulinnik inissiivigineqarsinnaanngitsut, Issittumi Sakkutooqarfiup pisortaa, kontreadmiral Henrik Kudsk oqarpoq:
- Piviusorsiornerunavianngilaq. Umiarsuaq hangareqanngippat qulimiguulimmik inissiivigineqarsinnaanngilaq. Ulloq ataaseq marlulluunniit inissiivigineqarsinnaassaaq, piffissamili sivisunerusumi inissiivigineqarsinnaanani. Qulimiguulimmi silamiitiinnarneqarsinnaanngilaq, Issittumi Sakkutooqarfiup pisortaa Henrik Kudsk oqarpoq.
Upalungaarsimaniarneq isumannaannerusoq ataqatigiissaarluagarlu pisariaqartinneqartoq, FSB-p nalunaarusiaani erseqqissaassutigineqarpoq, qulimiguulinnillu amerlanerusunik atorfissaqartitsisoqartoq, nalunaarusiami pingaarnertut ilaatigut aamma innersuussutigineqarluni.
Air Greenlandip S-61-iutini pilersaarutit malillugit ukiup massuma naanerani atorunnaartussaavai, suleqatigiissitaliarlu maanna misissuleruttorpaa tamanna qanoq kinguneqassanersoq.
S-61-it taakku ujaasinernut annaassiniarnernullu atorneqartarputtaaq.
Henrik Kudsk suleqatigiissitaliamut ilaatigut siunnersuisuuvoq, qulimiguullillu pillugit ajornartorsiutip qanoq ililluni aaqqiivigineqarsinnaanersoq annertunerusumik oqaaseqarfigerusunnagu.
Umiarsuilli alapernaarsuutit ataatsimik ilaneqarnissaat taassuma kissaatigaa:
- Umiarsuit alapernaarsuutit sisamat Kalaallit Nunaata sineriaani aasakkut angalaartalissapput, ataaserlu Savalimmiuniitinneqartassalluni. Kalaallit Nunaata sineriaani umiarsuit pingasut Savalimmiunilu ataaseq ukiuunerani atorneqartassapput, tamannalu naammaginartuusoraara, Henrik Kudsk oqarpoq.
Illersornissaqarfiullu timmisartuutaata Challengerimik taaguutillip annertunerusumik atorneqarsinnaanissaa, Henrik Kudskip kissaatigaa, timmisartoq taanna ujaasinernut atussallugu pitsaasuummat:
- Ikiortigisinnaasavut ungasissumiippata timmisartumik atuisinnaanissarput kissaatiginarpoq, timmisartormi sukkasuujuvoq, susoqarneranillu sukkasuumik paasisaqarsinnaalissagaluarluta, Issittumi Sakkutooqarfiup pisortaa oqarpoq.
Kalaallit Nunaanni upalungaarsimanissaq pillugu nalunaarut FSB-mit suliarineqartoq, upalungaarsimanissaq pillugu politikkikkut Nunatsinni akisussaasuusup Jens B. Frederiksenip, suli atuarsimannginnerarpaa, oqaaseqarfigerusunngikkallarlugulu.
Nunatsinni upalungaarsimaniarnerup massakkutut isikkoqartillugu isornartorsiorneqarnera taamaammat oqaaseqarfigisinnaannginnerarpaa.
