Unnuk kulturisiorfik unnugu
Suliffeqarfiit, kattuffiit peqatigiiffillu matuminnik ammatitsissapput, unammisitsineq, eqqumiitsulianik saqqummersitsineq, qilaatersorneq allarpassuillu tamakkunani pissapput, soorunalumi kaffeqarlunilu teeqassaaq, kaageqarlunilu.
Nuummi aaqqissuisussat 23-upput, taakkununngalu ilaavoq Air Greenland. Pisortaaneq Michael Binzer unnugu nalunaaqutaq qulingiluat qeqqata qulingiluallu akornanni apeqquteqarfigineqarsinnaavoq.
Apeqqutit ilaatigut makkuusinnaapput:
"Timmisartortartunut aaqqiagiinngissuteqarneq akilersinnaasimava? Namminersorlutik Oqartussat Air Icelandimit bilitsinik akikitsunik pisisalernerat Upernavimmut Paamiunullu sooq ajoqutaassava? Air Greenlandimi akissarsiat ataatsimut isigalugu qaffasippallaarpat?
Tamatumali pinnginnerani pisortaaneq apeqqarissaarfigineqassaaq nalunaaqutaq arfineq-pingasut qeqqaniit arfineq-pingasut tungaanut. Taanna tamanit malinnaaffigineqarsinnaassaaq, Sermitsiap aaqqissuisuunera Poul Krarup apeqqarissaartuussalluni.
Air Greenlandip ussassaarutaanut ilaatigut ilaapput angalanissamut neqeroorutit, unammisitsinerit, aamma timmisartut DASH-7-nit DASH-8-llu kiisalu qulimiguullit iluiniit paasisassarsiorfigineqarsinnaassallutik.
Ilanngullugu aamma oqaatigisinnaavarput KNR-imut unnugu nalunaaqutaq arfineq-marluniit misilitsikkiartortoqarsinnaammat. 18-it 30-llu akornanni ukioqaruit, taavalu aallakaatitassiani assingiitsuni saqqummiisussatut atuaasutulluunniit misilitsinnissat pilerigigukku unnugu nalunaaqutaq arfineq-marluniit misilitsikkiartoriannguarit.
