Unnerluussisoq: Hanaumi aallaasersortoq ammit qalipaataannik assigiinngisitsiniartartuunikuuvoq
Tysklandimi Hanaumi inuit qulingiluat imilertakkanik pujortaatitorniartarfinni marlunni aallaasersortoqarnerani toqutaasut qulingiluaasut saniasigut inuit arfinillit ikiligaapput.
Tysklandimi unnerluussisuuneq, Peter Frank, taama paasissutissiisoq, nutaarsiassaqartitsivik dpa allappoq.
Allaasersortoq arnaalu 72-inik ukiulik toqungasut illoqarfiup avataani tamatuma kingorna nassaarineqarput.
Pingasunngornermi unnukkut qulit missaanni aallaasersorpoq. Toqutaasut tamarmik nunani allani innuttaassuseqartuusut, Peter Frankip uppernarsarpaa.
Tysklandimi nutaarsiassaqartitsiviit naapertorlugit aallaasersortoq angutaavoq 43-inik ukiulik Tobias R-millu atilik.
Angut taanna ammit qalipaataannik assigiinngitsiniartorujussuusarsimasoq, Peter Frankip oqaatigaa.
AAMMA ATUARUK Tysklandimi inuit qulingiluat marloriarluni aallaasersortoqarnerani toqutaasut
Angut taanna kikkunnut atassuteqartarsimanersoq paasiniaanermi misissoqqissaarneqassaaq. Toqoraalluni aallaasersornissaminut maleruussimanersoq paasiniarlugu oqartussaasut tamanna paasiniaaffigeqqissaarusukkaat, Peter Frankip oqaatigaa.
Tyrkiamiut kurderillu toqutaasut ilagigaat, nunaarsiassaqartitsiviit arlallit allapput.
Tyrkiami innuttaassusillit tallimat toqutaasut ilagigaat, tyrkiamiut Berlinimi aallartitaqarfiata ilisimatitsissutigaa.
Sutorniartarfinni toqutaasut 21-t 44-llu akornanni ukioqarput.
Tysklandimi nutaarsiassaqartitsiviit arlallit naapertorlugit aallaasersortoq 43-nik ukiuliusoq talerperliunernut qaninniartupilussuunikuusimavoq. Tysklandimi aviisi Blid naapertorlugu angut taanna aallaasersornermut akisussaasuunerarluni allagaqarlunilu videoliorsimavoq.
Aviisi Blid naapertorlugu angut taanna inuit Tysklandimit anisitaasinnaasimanngitsut nungutitaatinneqartariaqarnerarlugit allassimavoq.
Angut taanna 43-nik ukiulik pinerluttuliorsimasutut siornatigut pineqaatissinneqarnikuusimanngitsoq, Peter Frankip ilisimatitsissutigaa.
Takornartanik iluarisaqanngitsutut ilisimaneqarsimanngitsoq pasinapiluttutulluunniit politiinit isigineqarsimanngitsoq, Tysklandimi unnerluussisuunerup oqaatigaa.
