Tysklandimi inuit qulingiluat marloriarluni aallaasersortoqarnerani toqutaasut
![](/sites/default/files/styles/image_934x467/public/article_images/20200220-070633-l-1920x1279we.jpg?itok=Eoh-xF6v)
Tysklandimi nunap ilaani Hessenimi illoqarfimmi Hanaumi inuit qulingiluat pingasunngornermi unnukkut marloriarluni aallaasersortoqarnerani toqutaapput.
Nutaarsiassaqartitsivik dpa naapertorlugu politiit sisamanngornerup ullaavani taama ilisimatitsipput. Aallaasersortoqarnerata kingunerisaanik politeerpassuit aallaasersortoq ujartorpaat.
Aallaasersortuusimassangatinneqartoq inimini toqungasoq kingusinnerusukkut nassaarineqarpoq. Inaanilu toqungasup timaa alla aamma nassaarineqartoq, politiit oqaaseqartartuata sisamanngornerup ullaavani ilisimatitsissutigaat.
Isummersuutini sakkortuut pillugit allagaqarlunilu videoliorsimasoq
Tysklandimi aviisi Blid naapertorlugu aallaasersorsimasoq isummersuutini sakkortuut pillugit allagaqarlunilu videoliorsimavoq. Marloriarlunilu aallaasersortoqarsimaneranut akisussaasuunerarsimalluni.
Paasissutissat taakkua ilumoornerat politiinit suli uppernarsarneqanngilaq.
- Allanik aallaasersortoqaqataasimaneranut maannamut takussutissaqanngitsoq, politiit Twitterikkut allapput.
- Toqungasuni nassaarineqartuni marluk qularnanngitsumik aallaasersortuusimassangatinneqartut, politiit ilisimatitsissutigaat.
Aallaasersortuusimassangatinneqartoq tyskiusoq
Toqungasut nassaarineqartut marluk qanoq toqusimanerat pillugu annerusumik paasissutissiisoqanngilaq.
Tysklandimi aviisi Blid naapertorlugu aallaasersortuusimassangatinneqartoq tyskisut innuttaassuseqartuusoq Tobias R-imik ateqarpoq.
Aallaasersortuusimassangatinneqartup inuit Tysklandimit anisitaajunnaarsimasut nungutitaatinneqartariaqartut allakkamini allassimagaa, aviisi Blid allappoq.