Unioqqutitsilluni isertoqarsimanera Sullissivimmut eqquisoq: NemId ataasinngornerup tungaanut atorsinnaanngilat
![](/sites/default/files/styles/image_934x467/public/article_images/nemid_noeglekort_ikon_jpg.png?itok=FTsustGV)
Maannakkumit ataasinngornerup tungaanut Sullissiviup nittartagaanut NemID atorlugu isersinnaanngilatit.
Namminersorlutik Oqartussammi Sullissiviup ilaa pisortallu nittartagaat allat arlallit matuaat.
Tamanna qitiusumik allaffissuaqarfiup serveriisa ilaannut unioqqutitsilluni isertoqarsimanerata paasineqarneranik pissuteqartoq, Naalakkersuisut tusagassiuutinut nalunaarummi paasissutissiipput.
AAMMA ATUARUK Qarasaasiatigut saassunneqarneq: Royal Greenlandimiit aningaasarsiassat eqqortut piareeqqajaasut
Taamaammat isumannaallisaaneq eqqarsaatigalugu pisullu qanoq ajoqutaasimatiginera pakkersimaarinninnissarlu pillugit qitiusumik allaffissuaqarfimmit nunatta avataanut attaveqarnerit tamarmik ataasinngornerup tungaanuugallartoq matuneqarallarput.
Mattussineq unioqqutitsilluni isertoqarneranik misissueqqissaarnermi qitiusumik allaffissuaqarfiup paasissutissaataanik illersuinerussaaq.
Isersinnaannginneq
Mattussineq pissutigalugu innuttaasut inuussutissarsiortullu nittartakkanut assigiinngitsunut isersinnaanerat sunnerneqassaaq, kiffartuussiviillu ilaat ataasinngorpamit atorneqaqqissinnaalissapput.
Internetikkut attaveqaatit digitaliusut nunatta avataanit avataanullu paasissutissanik aallertarfiit imaluunniit nassiussisarfiit uninngassapput.
Soorlu sullissivik.gl-imiittut NemID-mik atuiffiusut Danmarkimi serveriniit uppernarsaqqinneqartaramik taakku eqqorneqassasut.
- Maanna unioqqutitsilluni iserfigineqarsimaneq pimoorullugu aaqqiiviginiarneqarpoq, Namminersorlutik Oqartussat allapput, taakkulu ataasinngornermi unnukkut killiffik paasissutisseeqqissinnaanissartik naatsorsuutigaat.