Ungasianiit nakorsiartitsineq isumaqatigiinngissutigaat
- Pipaluk aatsaat atuleqqammerpoq, ajornartorsiutillu qaangerneqarumaarput, nakorsat pisortarigallagaat Kent Kleinschmidt oqarpoq.
- Ineriartortinneqarnera aatsaat aallartipparput. Ukiut kingulliit ikkussorneqarnikuuvoq, kisianni ajornartorsiutit assigiinngitsut piiarlugit nungulerpavut, Tele Greenlandillu nunaqarfiit kingulliit attavii ukioq manna aatsaat sukkatsittussaagamigit, sisamariaammik sukanerulersillugit. Taava iluamik ukioq manna aatsaat aallartissamaarpugut, nakorsat pisortarigallagaat Kent Kleinschmidt oqarpoq.
Tasiilami peqqissaavimmi nakorsaq Doris Palvio Pipalummik isornartorsiuivoq.
- Inunnik taarsiisinnaanngilluinnarpoq, nunaqarfimmi sulisoq taarsersinnaanngilaa. Iisartakkanik tunniussisinnaanngilaq, inuillu assigiinngitsut nappaataannik naliliisinnaanani, Tasiilami peqqissaaveqarfimmi nakorsaq Doris Palvio oqarpoq.
Nakorsiartitseriaaseq Pipaluk ukioq manna qaammatini sisamani siullerni ilimagisamiit atorneqarnerusimasoq KNR-imi qanittukkut allaaseraarput, nakorsat ilaat peqqissaasullu Pipalummik nersorinninnerat ilaatigut allaaseralutigu.
Uani atuaruk: http://knr.gl/kl/nutaarsiassat/pipaluk-peqqinnissaqarfimmi-iluatsilluart...
Doris Palviolli tamanna illuatungilerlugu oqaatigaa aningaasat Pipalummut atorneqartut pissusissamisoornerusumik atorneqarsinnaagaluartut, assersuutigalugu pikkorissarnernut assigisaanullu atorneqarsinnaanerarlugit.
Kent Kleinschmidtili akerlianik oqarpoq Peqqinnissaqarfik Pipaluup atulerneratigut aningaasanik sipaaruteqarsimasoq, qarasaasiallu Pipalummut atatillugu atorneqartut assersuutigalugu nunaqarfinni sulisut ilaannut ajornartorsiutaasarneranik Doris Palviop oqaaseqarnera akissuteqarfigalugu.
- Doris Palviosuuguma eqqarsassagaluarpunga: Soqutiginangaarami, makkua tusakkakka ajorneraasut amerlagaluaqisut. Ukua Uummannami ingerlalluartut, qanormitaavajuna atoramikku iluaqutigigaat? Sooruna Aperinngitsoq: Qanoq iliussaanga uanga illoqarfinni nunaqarfinnilu atorluassagukku? Nakorsat pisortaat Kent Kleinschmidt aperivoq.
Pipaluk assersuutigalugu uummatip sulineranik takutitsisinnaavoq uuttortaasinnaallunilu, soorlu aamma aap naqitsineranik, tillernermik, aap silaannarmik imaqassusianik uuttortaasinnaalluni, nappaatinillu amitsinniittunik assiliissutaasinnalluni.
