Unesco: Nunami eriagisami qamuteralannermut ajornaquteqanngitsumik immikkut akuersissuteqartoqarsinnaavoq
Avannaata Kommunia Ilulissat Kangiatalu Sulluata akornanni aqqutissiakkut qamuteralannissamut januaarip ulluisa 24-anni atuutilersumik immikkut akuersissuteqarpoq.
Ilulssat Kangiata Sullua Unescop nunarsuarmiut eriagisassaattut allattorsimaffianut 2004-imi ilannguppoq.
Aqqutissiaq taanna aalisartut Ilulissat Kangiata Sulluani aalisagartaminnik illoqarfimmut - ingammik Halibut Greenlandip aalisakkerivianut - assartuisinnaaqqullugit pilersinneqarpoq.
Danmarkip illussaarsuarnut kulturimullu aqutsisoqarfiata naalagaaffeqatigiinni sumiiffiit Unescop nunarsuarmiut eriagisassaattut allattorsimaffiani allassimasut akisussaaffigai, aqutsisoqarfiullu maskiinat aqqutiliuutit qamuteralaallu sumiiffimmi eriagisami tassani ingerlaarnissamut immikkut akuersissuteqartoqarallarsimanera ajornaquteqartinngilaa.
- Assersuutigaluguli aalisakkanik aqqutissiakkut tassuuna pisariaqartitamik assartuineq soorunami inerteqqutigineqarnavianngilaq. Isumaqarpugut isumannaatsumik aqqutiliortoqarnissaanut tassuunalu assartuisarnissamut aputeqarlualereertoq, illussaarsuarnut kulturimullu aqutsisoqarfiup nalagaaffeqatigiinni sumiiffiit pillugit saaffigisassatut atorfilittaa, Bolette Lehn Petersen, oqarpoq.
AAMMA ATUARUK UNESCO-p eriagisassatut allattorsimaffiatigut ingerlaartoqarsinnaanera akuersissutigaa
Kommunilli aqqutissiap qanoq ingerlaarfigineqartigineranik nakkutiginnilluarnissaa aqutsisoqarfiup piumasaraa.
Ilulissat Kangiata Sullua nunarsuarmiut eriagisassaraat, sumiiffiillu nunarsuarsuarmiut eriagisassaat qamutinik motoorilinnik ingerlaarfigineqaqqusaanngillat. Ilulissalli Kangerluata Sulluata eriagisassanngortinnera pillugu nalunaarut naapertorlugu kommuni aqqutissiakkut assartuisarnissamut akuersissuteqarsinnaavoq.
Aalisartunit takornariaqarnermillu sulialinnit nuannaarutigineqartoq
Aqqutissiaq nutaaq aalisarfiulluartartumut atammat Ilulissani eqqaanilu aalisartunit nuannaarutigineqarpoq.
Takornariaqarnermillu suliallit immikkut akuersissusiineq qujaruppaat. Takornariaqarnermik suliaqarfik, World of Greenland, assartuinermut aqqutissiap eqqaani illuikkiornikuuvoq, immikkullu akuersissusiineq takornarianik illuikkianut angallassinermut periarfissaqarnerulersitsivoq.
AAMMA ATUARUK Takornarianut apummik illuikkiat
- Aqqutissiakkut angallassisinnaanerput qujarupparput. Ilumummi angallassisinnaaginnasanerluta annilaangatigilaarnikuuarput, angallasseqqusaanngikkuttami illuikkiaqarfitsinnut ajutoorutaasimassagaluarmat, aqqulli taanna atuinnarsinnaanngoratsigu takornarianik illuikkianut illuikkianiillu angallassisinnaanngorpugut, World of Greenlandip pisortaa, Mike Rinno Kruse, oqarpoq.
Assartuinermut aqqutissiakkut ingerlaarnissamut immikkut akuersissut 2020-imi januaarip ulluisa 23-anni atuutilersoq 2020-imi takornariartitsilluni ukiukkut ulapaarfiup qaangiunnissaata tungaanut atuuppoq. Qaqugu ingerlaarfigineqaqqusaajunnaassanersoq Avannaata Kommuniata nalunaarutigissavaa.
