Nutaaliorneq: Takornarianut apummik illuikkiat

Immikkuullarissumik unnuisitsisalernissami ukiup ingerlaneranut takornariaqartarnermut siammerterititsinerusinnaasoq, Ilulissani takornariartitsisartut ilaannit, World of Greenlandimit, neriuutigineqarpoq.

- Tassanngaanniit aamma takornariat ingerlassinnaavagut. Soorlu apusiutinik atiseriarlugit pisuttuaqatigalugit imaluunniit qamuteralannik qimussimilluunniit angalalluta, Jakob Schytz, Ilulissanut eqqaanullu takornarianut misigisassarsiortitsisarfimmi, World of Greenlandimi, takornariat misigisassarsiortittarneranni pisortaq oqarpoq, nangillunilu:

- Maannakkut aalisartut illuaraannut qaninnerusalertussaangatta neriuutigaarput tassanngaanniit qimussertut pileriginerulersinnaassangaat.

Qimussertartut suleqatiginerulernissaat neriuutigaat

World of Greenlandimi qimussiussisartunik ukiuni kingullerni pissarsiniarnermini ajornartorsiuteqartarsimavoq.

Apummik illuikkiat World of Greenlandip Nalluarsuup tasiata eqqaani, illuaraatimi eqqaani, takornarianut unnuiffissatut neqeroorutigisarniarpai. Apummik illuikkiat tallimat, inunnit marlunnit siniffigineqarsinnaasut, sananeqassapput. Taakkualu qimussit illerngisa killingani sananeqassallutik.

- Takornariat unnuisarfissaannik Ilulissaniinngitsunik aamma aallartitserusukkatta. Taavalu aamma allatut ittunik tunerusulluta, Jakob Schytz oqarpoq.