Qaannamik Sisimiuni unammisut: Unammineq ingerlalluarpoq

Nunatsinni qaannat unammersuarnerat ingerlalluarpoq. 

Qaannat Kattuffiata siulittaasua Johanne P. Tobiassen taama oqarpoq.

- Maannamut killiffipput ajunngitsorujussuuvoq. Kinguartoorutivut, meeqqat pingasut kinngusaanngitsoornerat, massakkut kinngusaareerpata, iligiikkaarluni kinngusaartoqassaaq, kingornatigullu saaqqusersortoqassalluni. Meeqqallu taamaasillutik pereerpata, ingerlariusissarput tamakkiisumik malinnaaffigilissavarput.  

Peqataasussat Ilulissaneersut arlallit pissartanngorniutilernermut apuussinnaasimanngillat. Taakkunannga arlallit Nuummi sapaatip-akunnerata naanerani akunneqqapput. 

Taakkunanngalu arfinillit kingullerpaat suli Nuummiipput. Timmisartulli ilaaffigisinnaasaata ullaaq aallarnissaat taamaatitinneqarsimavoq: 

- Taava taakkua arfinillit qaqugorpiaq apuutissanersut naluara. Tamanna uggornaraluaqaaq. Kisianni unammiartut ikiuuttullu amerlanerpaartaat maaniipput. 

Ullumi pisussat qiviaraanni, meeqqat pingasut kinngusaassapput. Taava iligiikkaarluni kinngusaartoqassaaq. Kingullertullu saaqqusersortoqarluni, toraajuneqqusaattoqarluni naakkiarneqqortusaattoqassaaq. 

Ullorli naavitsinnagu imaassinnaavoq meeqqat ujaminnattussat ujamminnatsinneqassasut, meeqqat qanoq qasulertigiumaarnersut apeqqutaalluni. 

Aqagu ulloq unammersuarnermi susoqannginnissaanik pilersaaruteqarfigineqaraluarpoq. Kisianni ulloq meeqqat 14-it tungaannut ukiullit timersortarfimmi allunaariaqattaarnissaannut atorneqassaaq. 

Taava ulluni tulliuttuni pisussat qiviaraanni inersimasut allunaariaqattaassapput, maqittarlugu parrutissapput iligiikkaarlutillu parrutissallutik. 

- Aamma allunaariaqattaarnerit sakkortuukasiusarput. Allunaariaqattaartut timertik tamaat atortarpaat. Sakkortuvoq, kisianni timersuuterput taamaappoq. Aamma maqittarluni sakkortuvoq, paariarluni nunakkut maqilluni paaqqillunilu. Tassa pissanganartartut taanna.

Imalu nassuiarpaa: 

- Tassani paarnerinnaq apeqqutaaneq ajorami. Nioriallaqinnerit ikeriallaqqinnerillu apeqqutaallutik inissittaramik, aamma taanna nuannequtigisarpaa.