Nunatsinni qaannamik pissartanngorniunneq: Peqataasussat arlallit suli ingerlariaqqissinnaanngillat

Qaannamik pissartanngorniunnissami peqataasussat 30-t missaanniittut Sisimiunut timmisartuunneqarnissartik suli utaqqivaat. Timmisartuussinerup ajornartorsiutaanera kinguaattoornermut pissutaavoq – pingaartumik Ilulissani, tassanngami peqataasussat amerlanerpaat aallarnissamut mittarfimmit suli akuersissummik utaqqimmata. 

- Aaqqissuussineq pilersaarutit malillugit ingerlassaaq. Aaqqissuisut silassaq eqqarsaatigisariaqarpaat. Peqataasussattaaq amerlanersaat tikissimapput. Soorunami tamakkeratik tikimmata uggornarpoq. Neriuppugut qanittukkut tíkissasut, Johanne B. Tobiassen, Qaannat Kattuffianni siulittaasoq pissartanngorniunnermillu aaqqissueqataasoq, oqarpoq. 

Ippassaq peqataasussat 50-it missaanniittut Sisimiunut, tassa pissartanngorniuffiusussamut, timmisartumik tikissinnaasimanngillat. Qujanartumik aallartinnissamut nalunaaquttap-akunnialui sioqqullugit peqataasussat tikinngitsoornikut ikilerialaarput, peqataasussanulli suli tikinngitsunut kinguneqanngitsuunngilaq. 

- Soorunami unammeqataanngeqqaarnerannik kinguneqassaaq, tamannalu pointiannut kinguneqarsinnaavoq, taanna oqarpoq. 

Nalunaaqutaq ataatsimut unamminerup immikkoortua siulleq aallartissaaq - tamannali pisortatigoortuunngilaq. Tassani meeqqat assigiinngitsunik ukiullit imminnut unammissapput. 

- Qilanaaqaagut. Anori sakkukilliartorpoq, taamaattumik misigisaq nuannersuussaaq. Meeqqat minnerpaat Paaraarsummi unammissapput, tassanilu anorlerpiarnanilu mallerpiarneq ajorpoq, Johanne B. Tobiassen oqarpoq. 

Pisortatigoortumik unammineq nalunaaqutaq pingasunut aallartissaaq. Peqataasut akornanni qajartortartut Tysklandimeersut, USA-meersut Danmarkimeersullu peqataapput.