Unammillertaata periarfissaasa killeqalernerat Royal Greenlandip atorluarnianngilai

Royal Greenlandip siunissaq ungasinnerusoq eqqarsaatigalugu pilersaarutini attanniarpai, naak Ruslandimi periarfissat ammagaluartut.

Unammillertaata periarfissai killeqalersimapput, naallu Rusland nioqqutissanik EU-meersunik eqqusseqqusiunnaarnissamik iliuuseqaraluartoq, Royal Greenlandip tamanna iluaqutiginavianngilaa.

Bruno Olesen, Royal Greenlandip tuniniaanermut pisortaa, aviisimut Jyllands-Postenimut oqarpoq Ruslandip EU-mut iliuuserisai Royal Greenlandimut annertunerusumik sunniuteqarnavianngitsoq.

Ruslandip nioqqutissanik EU-meersunik eqqusseqqusiunnaarnerani Kalaallit Nunaat ilaatinneqanngilaq, Royal Greenlandilli unammillertaanik annermik Canadamik eqquissalluni.

Unammillertip periarfissaasa killeqalersimanerat eqqarsaatigalugu Royal Greenland aningaasarsiorluarnerulersinnaasoq ilimagineqarsinnaagaluarpoq, Bruno Olesenilli maanna oqaatigaa siammasinnerusumik iliuuseqartoqartariaqartoq.

- Immap nillertup raajai 23.000 tonsit Ruslandimut ukiumut tunineqartarput, taakkunannga 19.000 tonsit missaat Canadameersuullutik, tassa siunissaq qaninnerusoq eqqarsaatigalugu amerlanernik piumasaqartoqassaaq, Ruslandimulli immikkut tunisaqarnissamik pilersaaruteqanngilagut, Bruno Olesen, Jyllands-Postenimut oqarpoq, nangillunilu:

- Qanoq iliorsinnaanerput soorunami nalilersortarparput, aningaasarsiorluarnerusinnaanissarpulli ilimaginngilarput. Ukrainemi pisut qaammatip tulliuttup ataatsip ingerlanerani pitsaanerulissappata Ruslandip nioqqutissanik EU-mit Ruslandimut eqqusseqqusinnginnera atorunnaassaaq, taamaammat unammillertivut piffissami killeqartumi periarfissaqannginnerat aallaavigalugu pilersaarusiorsinnaanngilagut, Olesen oqarpoq.

Asiap kangiani niuffaffiit Royal Greenlandip aallunnerusimavai, tamannalu allanngortinneqarnavianngilaq:

- Asiami niueqateqarnissaq ukiorpassuarni sulissutiginikuuarput, tamannalu nangissavarput. Ruslandimut eqqusseqqusiunnaarneq iluaqutiginiarsarinianngilarput, tassami siunissaq ungasinnerusoq eqqarsaatigalugu pissusissamisuunnginnami, Bruno Olesen oqarpoq.

Canadap raajanik Ruslandimut nioqquteqarsinnaannginnini pissutigalugu nunanut allanut tunisaqartariaqassaaq, raajallu akiinut tamanna sunniuteqassaaq:

- Taamaammat isumaqarpunga uagutsinnut sunniuteqangaarnavianngitsoq. Rusland eqqarsaatigalugu raajat akii qaffassapput, nunanili allani appariassallutik, Royal Greenlandip tuniniaanermut pisortaa Jyllands-Postenimut oqarpoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat