Unammilleqatigiinnermut Ataatsimiititaliaq eqqartuussivilersuunneqarpoq

Suliffeqarfiit suut Greenland Venture-imit aningaasaliiffigineqarsimanersut kiisalu sooq aningaasaliiffigineqarsimanersut pillugit Unammilleqatigiinnermut Ataatsimiititaliamit paasiniaaneq, Greenland Venturemit akuerineqanngilaq, eqqartuussivimmullu ingerlateqqinneqarluni.

Unammilleqatigiinnermut Ataatsimiititaliap Greenland Venture-imut siorna oktobarimi naatsukullammik allagaqaateqarnera tunuliaqutaavoq, eqqartussisutigullu suliaq ataasinngorpat septembarip 28-ani aallartissaaq.

Greenland Venture-ip suliaminut tunngatillugu inatsisinik atuuttunik unioqqutitsinnginnera Unammilleqatigiinnermut Ataatsimiititaliap qulakkeerniarsimavaa, unammilleqatigiinnermut inatsimmi paragraf 12 matumani qitiulluni. Oqartussaninngaanniit aningaasaliisoqarnermi unammilleqatigiinnermut inatsimmi paragraf 12 unioqqutinneqarsimanersoq ataatsimiititaliap paasiniassallugu kissaatigisimavaa.

Suliffeqarfiit sorliit Greenland Venture-ip aningaasaliiffigisimanerai Unammilleqatigiinnermut Ataatsimiititaliap nassuiaateqaqqusimavaa.

Greenland Venture-ip tamanna qisuariaateqarfigaa, oqaatsit "oqartussanit aningaasaliisarneq" Greenland Venture-imiit maluginiarneqarlutik.

Greenland Venture-ip aktiaateqarluni piginneqatigiiffiunera, niuernerpalaartumillu ingerlatsiffiunera Greenland Venture-ip akissutaani allassimavoq.

- Niuernikkut iliuutsit tamarmik suliffeqarfiup aningaasaataasa iluanni ingerlanneqarput, Namminersorlutik Oqartussat aningaasaliissutaannit pinatik, Greenland Venture akissummi allappoq, Unammilleqatigiinnermut inatsimmi paragraf 12-ip unioqqutinneqarsimannginnera oqariartuutigineqarluni.

Taamaattoq unammilleqatigiinnermut oqartussat suleqatigilluinnarlugit Greenland Venture iliuuseqarumavoq, isertuussaqannginnertilli inatsisitigullu piumasaqaateqarfigineqarsinnaannginnertik erseqqissaatigalugu.

Tamanna Unammilleqatigiinnermut Ataatsimiititaliamit naammagineqanngilaq, paasissutissat piumaneqartut ullut arfineq-marluk ingerlaneranni tunniunneqanngippata akiliisitaasoqarsinnaanissaa oqaatigineqarluni.

Greenland Venture-ip Unammilleqatigiinnermut Ataatsimiititaliaq oqaloqatigerusukkaluarpaa, Ataatsimiititalialli piumasaqaatini attatiinnarmagit Greenland Venture-ip eqqartuussisuserisua qisuariaateqarpoq, suliarlu eqqartuussivikkoortinneqalerluni.