Unammilleqatigiinnermi unioqqutitsisut parnaarussaasassapput
Unammilleqatigiinneq pillugu inatsisinik misissuisut, ataatsimiititaliap 2009-mi pilersinneqartup, innersuussutai tunngavigalugit, suliffissuaqarnermut ineriartortitsinermullu ministeri, Ole Sohn taama isumaqarpoq.
Aningaasanik peqquserlunnertut unammilleqatigiinnermik unioqqutitsisut pillarneqartalernissaat ataatsimiititaliap innersuussutigaa. Aningaasanik peqquserlunnerup kinguneranik akiligassarpassuaqartoqalersinnaavoq aamma parnaarussaasoqarsinnaalluni.
- Unammilleqatigiinninermut tamakku pitsanngorsaataasinnaalluarput, Ole Sohn aviisimut Politikenimut oqarpoq.
Akinik isumaqatigiittarnernik ilisimatusartut takutippaat, 46 procentiniit 49 procentit angullugit akisunaarisoqartarsimasoq.
Ataatsimiisitaliami ilaasortat ilagaat, Dansk Industrip aallartitaa, taassumalu Ole Sohnip parnaarussaasoqartalernissaanik oqalunnera isumaqatiginngilaa.
- Taama sioorasaarisoqarnerata kingunerilluarsinnaavaa, suliffissuit imminnut attavigiikkusukkunnaarneri, tamatumalu kingunerissallugu soorlu ilisimatusarnerit suleqatigiissutaasinnaajunnaarnerinut, Dansk Industrip aallartitaa, Kim Haggren aviisimut Politikenimut oqarpoq.
Christiansborgimi Folketingimut ilaasortat amerlanersaasa inatsisit sukaterneqarnissaat isumaqatigaat.
Maani Nunatsinni unammilleqatigiinnermi inatsisit unioqqutinneqarnerisa kingorna, poorski sioqqutilaarlugu eqqartuussinermi pisuutinneqartut akiligassinneqarput.