AWG2016 Unammeqataasussat Kangerlussuarmiittut: Isumagilluarneqaqaagut

Arctic Winter Gamesimut peqataajartortut 500-t sinneqartut maanna Kangerlussuarmi aallarneq ajuleqqapput. Taakkulu ilagaat Margie Peters, Team Yukonip aputisiuserluni arpattartui sisorartartuilu peqatigalugit ilaasoq.

Aamma atuaruk AWG2016 Kajumissutsiminnik suleqataasut anorersuaraluartoq ikiuupput

Team Yukon Kangerlussuarmut ullaaq tikikkamik uninngaqqaartariaqarlutik paasitinneqarput.

Kangerlussuup silaginnera pissutigalugu taama oqarfigineqarnertik Petersip eqqumiigigaluarpaa.

- Maani Kangerlussuarmi seqinnerpoq erseqqarillunilu. Silarlunneq pissutigalugu Nuummut aarlassinnaannginnerput upperiuminaappoq, Margie Peters oqarpoq.

Aamma atuaruk AWG2016 KNR Kangerlussuarmi: Maani qiimarrapput

Kangerlussuarmut tikilluaqqusaasorujussuusut, eqqissisimaarfissaqartitaasut nerisassanillu mamartunik tunineqarsimasut, Peters oqaluttuarpoq. Kangerlussuarmiittullu isumagissaartut, ingerlaqqinnissaminullu qilanaartut, aamma oqaatigaa.

Aamma atuaruk AWG2016 Timmisartuussinissat kinguartinneqarput

- Qitittartut quianartut, kiinnaminnik aappalaartumik qernertumillu qalipassimasut ullumi takkuteriasaarput. Immaqa tupatsinniarluta. Taamaaliortoqarnera quianarpoq, aliikkutaallunilu, Margie Peters oqarpoq. AWG-mullu peqataasussat tamarmik unammiuaarnerit aallartinnissaannut qilanaartut oqaluttuaralugu.

Aamma atuaruk AWG2016: Unnuaq naallugu timmisartuussisoqassaaq

- Yukonimi sisorartartut arlallit Nuummi Arctic Winter Gamesimut peqataasussatut toqqarneqarnissaminnik ukiuni arlalinni neriuuteqarput. Tamaanngalu apuunnerput immikkuullarissumik misiginarpoq. Uagut nunatsinni orpippassuaqarpoq, immamullu ungasissumi najugaqarluta. Taamaammat Kalaallit Nunaat sungiusimasatsinnit allaanerujussuuvoq. Aamma nerisassat allaanerupput. Nerisassat sungiusimasatsinnit allaanerusut nalaassallugit piareersimareerpugut. Puisi aalisakkallu panertut misilereerpagut. Taakkualu mamaqaat, Margie Peters oqarpoq.