AWG2016 Kajumissutsiminnik suleqataasut anorersuaraluartoq ikiuupput
- Tulluusimaartorujussuuvugut. Anorersuartorsuugaluartoq kajumissutsiminnik suleqataasut illoqarfiup iluani suliassaqarfinnut aggikaapput. Kavaajat qorsuit sumi tamaani takussaapput suliassallu naammarsineqartartut, AWG2016-imi pisortaq Maliina Abelsen tusagassiortunut nalunaarummini oqarpoq.
Arfininngornermi kingusissukkut Kangerlussuarmiit tikerarnissaannut isumagisassat kingulliit inissikkiartuaarput.
Ullaaq mannaannaq AWG2016-imi kajumissutsiminnik suleqataasut 150-nit amerlanernik ikiuuttoqarpoq. Kangerlussuarmilu 20-it misserlugit. Ullup ingerlanerani Nuummi kisitsisit amerliartussapput Kangerlussuarmiit tikittut malitsigalugit.
- Imaattunik pisoqartitsileraanni unammillernartut avaqqunneqarsinnaanngillat imaluunniit agginngitsoonerit, kisianni aamma pisoqartsitsisinnaanngilaq Nunarsuarmi kajumissutsiminnik suleqataasutsialassuarnik ikiorteqanngikkaanni. Taamaattunillu ulluni makkunani Nuummi Kangerlussuarmilu peqarlutik, Maliina Abelsen oqarpoq.
Maliinallu nuannaarutigeqaa maannakkorpiaq sila unammillernarujussuugaluartoq, kajumissutsimik suleqataasut suliassat naammassisarmatigit.
- Kalaallit Nunatta oqaluttuarisaanerani pisoq annerpaaq isumagivarput, massakkumullu tikillugu sila piuminaalliortitsivoq. Nuannaarutissaqarlualiinnarpugut, pissutsini ajornakusooraluartuni suliassat naammassiinnarnagit aammattaaq kajumissutsiminnik suleqataasorpassuit tunniusimalluinnartumik aggertarmata suliassallu naammassisarlugit, taamatuttaaq misigisamik pilersitsiutigalutik pissarsiaqarlutik, Pisortaq Maliina Abelsen oqarpoq.