Umimmannik tuttunillu Tasiilap eqqaanut nuussisoqassava?

Tuttunik umimmannillu Tasiilap eqqaanut nuussinissamik eqqarsaat Kommuneqarfik Sermersuup Tasiilami tusarniaassutigaa.
Allattoq Noah Mølgaard
februaarip 26-at 2013 07:17

Tasiilap avannaani tuttoqarsimagalarpoq, taakkuli ukiut 100-ut matuma siorna nungussimapput. Maanna Kommuneqarfik Sermersooq isummerpoq inuuniarfigissallugu peqqarniissinnaagaluartumi tuttut umimmaallu uumaannarsinnaanerisa misiliiffigineqarnissaanut piffissanngortoq.

Piniarnermut aalisarnermullu siunnersorti Ludvig Hansen Tasiilameeqqammerpoq innuttaasut isumaat tusarniarlugu.

Piniarnermut periarfissat tuttunik umimmannillu tapertaqalernissaat soqutigineqartoq, Kommuneqarfik Sermersooq nittartakkamini allappoq.

Tasiilamiit 400 kilometerisut kujasinnerusumiittoq Skjoldungen umimmaliiffigineqarsinnaasutut Tasiilarmiut piukkuppaat.

Tasiilap avannaani tuttoqarfiusimasoq tuttuliiffissatut piukkunneqarpoq tassanilu isumaliutigineqarpoq Svaldbartimiit tuttunik tunumut nuussisinnaaneq.

Tuttunilli umimmannillu nuussinissaq qanittumi pinavianngilaq. Suliaq maanna allaffissornikkut suliareqqitassanngortinneqarpoq tamatumalu kingorna kommunalbestyrelsemit isummerfigineqartussaalluni.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq